राखी सावंतला ट्रान्झिट जामीन मंजूर

म. टा. खास प्रतिनिधी, मुंबई

‘रामायणकार’ वाल्मिकी ऋषींविरोधात अपशब्द उच्चारल्याच्या प्रकरणात पंजाबमधील लुधियाना न्याय दंडाधिकारी न्यायालयाने अजामीनपात्र अटक वॉरंट बजावल्याने अडचणीत आलेल्या अभिनेत्री राखी सावंतला सोमवारी अखेर मुंबई उच्च न्यायालयाकडून तात्पुरता दिलासा मिळाला. उच्च न्यायालयाने तिला तीन आठवड्यांसाठी ट्रान्झिट जामीन मंजूर केला असल्याने या कालावधीत तिला वॉरंट रद्द करून घेण्यासाठी किंवा अन्य कायदेशीर मार्ग अवलंबण्यासाठी संबंधित न्यायालयात अर्ज करता येईल.

पोलिस तक्रारीनंतर याप्रकरणी वारंवार समन्स बजावूनही राखी न्यायालयात हजर झाली नव्हती. म्हणून न्यायालयाने ९ मार्चला अजामीनपात्र अटक वॉरंट बजावले होते. त्यामुळे अटकेच्या भीतीने तिने उच्च न्यायालयात अॅड. आतिफ शेख यांच्यामार्फत अर्ज केला होता. त्यावर न्या. अजय गडकरी यांच्यासमोर सोमवारी सुनावणी झाली.