वृद्धेवर बलात्कार, हत्या; आरोपी अटकेत

म. टा. खास प्रतिनिधी, मुंबई

पश्चिम बंगालमध्ये वयोवृद्ध महिलेवर बलात्कार आणि हत्या करून फरार झालेल्या दोघा आरोपींना एमआरए पोलिसांनी मुंबईतून अटक केली. हे दोन्ही आरोपी तीन वर्षांपूर्वी मुंबईतील नोकरी सोडून पश्चिम बंगालमधील राणाघाट भागात गेले होते. तिथे ७ मे रोजी ६५ वर्षांच्या महिलेवर बलात्कारानंतर हत्या करून दोघेही पसार झाले होते. हे दोघेही मुंबईत लपले असल्याची माहिती मिळाल्यावरून पोलिसांनी त्यांचा शोध सुरू केला होता.

राणाघाट भागातील कूपर कॅम्प येथे रेल्वे रुळाजवळ ७ मे रोजी दोघेही आरोपी पार्टी करत होते. तिथे ही वयोवृद्ध जेवल्यावर हात धुण्यासाठी आली असता तिचा आणि या दोघांचा वाद झाला. तेव्हा यातील एका आरोपीने तिला मारहाण करून बलात्कार केला. त्यानंतर तिने मदतीसाठी आवाज देताच दोघांनी तिची हत्या केली. त्यानंतर दोघेही मुंबईत पळाले.

एमआरए मार्ग पोलिस स्टेशनचे पीएसआर पीरमोहम्मद शेख यांना हे दोन्ही आरोपी सीएसएटी परिसरात येणार असल्याची माहिती मिळाली. त्यावरून वरिष्ठ पोलिस निरीक्षक सुखलाल वर्पे यांनी तातडीने एपीआय संदीप सावंत, पीएसआय शेख, महाले, शेजवळ यांचे पथक तयार केले. त्यांनी रिगल सिनेमाजवळ दोघेही येणार असल्याची माहिती मिळाल्यानुसार तिथे सापळा रचला. त्यानुसार दोघेही तिथे आले असता त्यांना अटक करण्यात आली.