म. टा. खास प्रतिनिधी, मुंबई
मध्य रेल्वेवर गाड्यांची रखडपट्टी कमी होत नसल्याचा प्रत्यय सोमवारी हार्बर मार्गावर आला. मेगाब्लॉकनंतर दुसऱ्याच दिवशी हार्बरवर वेगवेगळ्या कारणांनी सेवा उशिराने धावत होत्या. बेलापूर ते सीवूड दारावेमध्ये सकाळी ९.३५ च्या सुमारास रुळास तडा गेला. त्यानंतर खारघर येथे स. ११च्या सुमारास लोकलमधील तांत्रिक बिघाडाने लोकलसेवेत ५० मिनिटांचा खंड पडला. सकाळच्या दोन घटनांमुळे १५ फेऱ्या रद्द झाल्या आणि काही फेऱ्या उशिराने धावत होत्या.
या बिघाडामुळे सकाळच्या वेळेत प्रवाशांना त्रासास सामोरे जावे लागले. या बिघाडामुळे अप मार्गावरील वाहतूक पूर्णपणे खोळंबली होती. दुरुस्तीचे काम लगेचच हाती घेण्यात आले. साधारण अर्धा तासानंतर दुरुस्ती पूर्ण झाली. मात्र, या सेवा विस्कळीत झाल्याने स्थानकांवर प्रवाशांची गर्दी झाली होती. पनवेल ते छत्रपती शिवाजी महाराज टर्मिनसपर्यंत जाणारी वाहतूक उशिराने धावत होती. हा बिघाड दुरुस्त होईपर्यंत खारघर येथे ११ वाजता एका लोकलमध्ये तांत्रिक बिघाड झाला. या दुहेरी फटक्याने हार्बरची सेवा पूर्णत: विस्कळीत झाली.
दोन्ही दिशांकडील वाहतूक उशिराने सुरू असल्याने प्रवाशांना आठवड्याच्या पहिल्याच दिवशी त्रास सहन करावा लागला. दुपारनंतर या मार्गावरील वाहतूक हळूहळू पूर्ववत होत गेली.