दादर बळकावण्याआधीच शिवसेनेत बंड

मटा ऑनलाइन वृत्त । मुंबई

मनसेच्या ताब्यातून दादर-माहिम मतदारसंघ हिसकावून घेण्यासाठी शिवसेनेने कंबर कसलेली असतानाच शिवसेनेतील पक्षांतर्गत बंडाळीने डोकेवर काढले आहे. शिवसेनेच्या महिला संघटिका रोहिता ठाकूर यांनी बंडाचे निशाण फडकावले असून अपक्ष निवडणूक लढण्याचा निर्णय घेतला आहे. त्यामुळे दादर सर करण्याआधीच शिवसेनेची डोकेदुखी वाढली आहे.

दादर-माहिम विधानसभेतील शिवसेना शाखा क्रमांक १९० च्या महिला शाखा संघटक रोहिता ठाकूर यांना डावलून माजी उपविभाग प्रमुख राजू पाटणकर यांच्या पत्नी तृप्ती पाटणकर यांना वॉर्ड क्रमांक १९० मधून उमेदवारी देण्यात आली आहे. शिवसेना आमदार सदा सरवणकर यांनी पत्ता कापल्याने नाराज झालेल्या रोहिता यांनी अपक्ष उमेदवारी अर्ज भरण्याचा निर्णय घेतला आहे. तृप्ती पाटणकर यांनी कधी शाखेचं तोंडही पाहिलेलं नाही, शिवाय त्या निवडणूक लढविण्यासाठी इच्छूक नसतानाही त्यांना जबरदस्तीने निवडणूक रिंगणात उतरविले जात आहे, असा आरोप रोहिता यांचे पती मनोज ठाकूर यांनी केला. दरम्यान पक्ष सोडून जाणाऱ्यांची संख्या वाढत असताना पक्षातच बंड निर्माण झाल्याने शिवसेनेमध्ये खळबळ निर्माण झाली आहे.