Republic Day 2022 Maharashtra : मुंबईत प्रजासत्ताक दिनाच्या कार्यक्रमाला मुख्यमंत्र्यांची उपस्थिती; संचलनाला सुरुवात

मुंबई: भारताच्या ७३व्या प्रजासत्ताक दिनानिमित्त देशभरात विविध ठिकाणी कार्यक्रमांचे आयोजन करण्यात आले आहे. या पार्श्वभूमीवर राज्याचे मुख्यमंत्री उद्धव ठाकरे मुंबईच्या शिवाजी पार्क येथे प्रजासत्ताक दिनाच्या कार्यक्रमाला उपस्थित राहणार आहेत. तत्पूर्वी राज्याचे मंत्री आदित्य ठाकरे यांनी वांद्रे जिल्हाधिकारी कार्यालयात ध्वजारोहण केले. तब्बल अडीच महिन्यानंतर मुख्यमंत्री उद्धव ठाकरे प्रत्यक्षात एखाद्या कार्यक्रमाला हजेरी लावणार आहेत. त्यामुळे सर्वांनाच उद्धव ठाकरे यांना पाहण्याची उत्सुकता लागली आहे. मुख्यमंत्र्यांनी शिवाजी पार्कवर जाण्यापूर्वी त्यांच्या वर्षा या शासकीय निवासस्थानीही ध्वजारोहण केले. (Republic Day 2022 Maharashtra )

१२ नोव्हेंबरला मुंबईच्या रिलायन्स रुग्णालयात मुख्यमंत्री उद्धव ठाकरे यांच्या मणक्याची शस्त्रक्रिया झाली होती. त्यानंतर २ डिसेंबरला उद्धव ठाकरे यांना रुग्णालयातून डिस्चार्ज मिळाला होता. तेव्हापासून उद्धव ठाकरे हे मातोश्रीवर बसूनच राज्याचा कारभार हाताळत आहेत. या काळात सर्व प्रशासकीय चर्चा, टास्क फोर्स आणि मंत्रिमंडळाच्या बैठकांना उद्धव ठाकरे व्हीडिओ कॉन्फरन्सिंगच्या माध्यमातूनच हजेरी लावत होते. गेल्याच महिन्यात पार पडलेल्या हिवाळी अधिवेशनालाही ते उपस्थित राहू शकले नव्हते. त्यानंतर उद्धव ठाकरे पंतप्रधान मोदी यांनी बोलवलेल्या बैठकीलाही ते गैरहजर होते. इतका काळ मुख्यमंत्री दिसत नसल्याने विरोधकांनी टीका करायला सुरुवात केली होती. उद्धव ठाकरे यांना जमत नसल्यास त्यांनी मुख्यमंत्रीपदाचा चार्ज तात्पुरता दुसऱ्या नेत्याकडे द्यावा, अशी मागणीही भाजपच्या नेत्यांनी केली होती.

LIVE Updates:

* राज्यपालांच्या हस्ते शिवाजी पार्कवर ध्वजारोहण
* आदित्य ठाकरेंच्या हस्ते वांद्रे जिल्हाधिकारी कार्यालयात ध्वजारोहण
* मुख्यमंत्री उद्ध ठाकरे यांच्या हस्ते वर्षावर बंगल्यावर ध्वजारोहण