‘रेरा’ने ठोठावला आठ बिल्डरांना दंड

म. टा. प्रतिनिधी, मुंबई

स्वत:च्या गृहनिर्माण प्रकल्पांची वृतपत्रांना जाहिरात देताना महारेराच्या नियमावलीचा भंग केल्याबद्दल महारेरा प्राधिकरणाने आठ बिल्डरांना दोन ते १० लाखांचा दंड ठोठावला आहे. आठपैकी सात बिल्डरांना प्रत्येकी दोन लाखांचा, तर एका बिल्डरला १० लाखांचा दंड ठोठावला आहे.

गृहनिर्माण प्रकल्पांची जाहिरात करावयाची असल्यास विकासकांनी महारेराकडे नोंदणी करणे बंधनकारक आहे. जाहिरातीत महारेराच्या वेबसाइटचा उल्लेख करायचा असतो. नोंदणी केलेला क्रमांक नोंदवायचा असतो. या नियमांचे पालन केल्यानंतरच जाहिरात देता येते. मात्र आठ बिल्डरांनी नियमांचा भंग केल्याबद्दल त्यांच्यावर कारवाईचा बडगा उगारण्यात आला आहे. त्रिधातू मौर्य या बिल्डरने महारेराकडे नोंदणी न करताच जाहिरात दिल्याने त्यांना तब्बल दहा लाखांचा दंड ठोठावण्यात आला आहे. जाहिरातीत महारेराच्या वेबसाइटचा उल्लेख नसल्याबद्दल सुमित ग्रुप, द वाधवा ग्रुप, इप्सित प्रोजेक्ट, ज्योती बिल्डर्स, परिणी बिल्डिंग प्रॉपर्टीज, हावरे प्रॉपर्टीज व कर्म इन्फ्रास्ट्रक्चर प्रा. लि. या सात बिल्डरांना प्रत्येकी दोन लाखांचा दंड ठेाठावण्यात आला आहे.