मानखुर्द लोकल पुन्हा सुरू करा

म. टा. खास प्रतिनिधी, मुंबई

हार्बर मार्गावरील लोकल सेवेस सापत्न वागणूक दिली जात असल्याची टीका वारंवार होत असतानाच, मानखुर्दहून सीएसएमटीसाटी सुटणाऱ्या दोन विशेष लोकल पावसाळ्यात रद्द करण्यात आल्याने मानखुर्दमधील हजारो प्रवाशांमध्ये नाराजी आहे. दरवर्षीप्रमाणे यावर्षीही ही सेवा सुरू करण्यासाठी आंदोलन पुकारावे लागेल, असा इशारा प्रवासीवर्गाने दिला आहे.

हार्बरवर गेल्या काही वर्षांपासून मानखुर्द ते सीएसएमटीपर्यंत दोन विशेष फेऱ्या चालवल्या जातात. सकाळी ८.०५ आणि ८.३५ वाजता या दोन लोकल सुटतात. पण या लोकलचा रूळ सखल भागात असल्याने सावधगिरी म्हणून पावसाळ्यापुरती ही सेवा तात्पुरती थांबवली जाते. यंदाही पावसाळा सुरू होताच मध्य रेल्वेने काही दिवसांपासून या विशेष फेऱ्या खंडित केल्या आहेत. परंतु यामुळे मानखुर्द स्थानकातील प्रवाशांचे प्रचंड हाल होत आहेत.

सकाळच्या ऐन गर्दीच्या वेळेस मानखुर्द स्थानकातील प्रवाशांना सीएसएमटीच्या दिशेने जाणाऱ्या अन्य लोकलमध्ये शिरणेही कठीण होते. हा प्रवास जीवावर बेतण्याची भीती इथल्या प्रवाशांना वाटते. वाशीहून येणाऱ्या लोकल भरभरून येत असल्याने मानखुर्द स्थानकातील प्रवासी हतबल झाले आहेत. मानखुर्द स्थानकात या दोन्ही लोकलसाठी मानखुर्द, गोवंडी, शिवाजीनगर, देवनार, ट्रॉम्बे आदी भागातील प्रवासी येतात. त्या सर्वांचीच गैरसोय झाली असून या सेवा पुन्हा सुरू करण्याची मागणी केली जात आहे.

यापूर्वीही आंदोलने

मध्य रेल्वेने याआधीही पावसाळ्यात तांत्रिक कारणाने ही सेवा बंद केली होती. मात्र त्याविरोधात आंदोलन पुकारल्यावर लोकल सेवा सुरू करण्यात आली होती. त्यामुळे यावर्षीही आंदोलन पुकारल्यानंतर या सेवा पुन्हा सुरू होणार का, असा प्रश्न प्रवाशांकडून उपस्थित केला जात आहे.