मध्यवर्ती कारागृहासाठी महसूल खात्याचा भूखंड

म. टा. विशेष प्रतिनधी, मुंबई

राज्यातील कारागृहांमध्ये कैद्यांची संख्या क्षमतेबाहेर गेली असून, त्यांच्यावर नियंत्रण ठेवणेही कारागृह प्रशासनाला कठीण होऊ लागले आहे. कारागृहांत कैद्यांमध्ये हाणामारी होण्याच्या घटनाही वाढल्या आहेत. यामध्ये काही कैद्यांना जीवही गमावावा लागला असून, काही कैद्यांनी पलायन केल्याच्या घटनाही घडल्या आहेत. या गोष्टी टाळण्यासाठीच मानखुर्दमध्ये नवे मध्यवर्ती कारागृह उभारण्याचा निर्णय झाला आहे.

कारागृह प्रशासनाकडून मुंबई शहर आणि परिसरात गेल्या काही महिन्यांपासून मध्यवर्ती कारागृह उभारण्यासाठी जागांचा शोध सुरू होता. मुंबई आणि परिसरात जागेच्या मर्यादेमुळे भूखंड मिळणे कठीण बनले होते. तरीही गृहखात्याने मानखुर्द येथील मंडाळा गावाच्या हद्दीत पाच एकर भूखंडांचा शोध घेतला. हा भूखंड महसूल विभागाचा असून, तो देण्यास महसूल विभागानेही हिरवा कंदिल दाखवला आहे. त्यामुळे प्रशासकीय कार्यवाहीला सुरुवात झाली आहे.