रितेशचा पाकिस्तानी कलाकारांना पाठिंबा

मटा ऑनलाइन वृत्त। मुंबई

महाराष्ट्र नवनिर्माण सेनेने पाकिस्तानी कलाकारांना विरोध करत देश सोडण्यासाठी ४८ तासांची मुदत दिलेली असताना अभिनेता रितेश देखमुख यांनी मात्र पाकिस्तानी कलाकारांची बाजू घेतली आहे. 'मुद्दा कोणताही असो, कलाकारांनाच पहिल्यांदा लक्ष्य केलं जातं,' अशी खंत व्यक्त करत रितेश देशमुख पाकिस्तानी कलाकारांच्या बाजुने उभा राहिला आहे.

महाराष्ट्र नवनिर्माण सेनेने पाकिस्तानी कलाकारांना ४८ तासांत देश सोडा अन्यथा आमच्या स्टाइलने पळवून लावू असा इशारा दिला आहे. मुंबई किंवा महाराष्ट्रात जिथे कुठे पाकिस्तानी कलाकारांचं शूटिंग सुरू असेल, ते उधळून लावू आणि त्यांना कामं देणाऱ्या निर्मात्यांनाही चोपू. आता खरंच आमची सटकली आहे, अशी तीव्र प्रतिक्रिया चित्रपट सेनेचे अध्यक्ष अमेय खोपकर यांनी 'मटा ऑनलाइन'शी बोलताना व्यक्त केली होती.

मनसेच्या भूमिकेवर रितेश म्हणाला 'कलाकार हे सॉफ्ट टार्गेट असतात. हे दुर्दैवी आहे. खरे तर मुद्दा वेगळाच असतो. मात्र कलाकारांवर बंदी घालणं हा यावरील उपाय नाही.'

रितेश देशमुखचा रवी जाधव दिग्दर्शीत ‘बँजो’ हा सिनेमा प्रदर्शित झाला आहे. नर्गिस फाखरी ही या चित्रपटात रितेशसोबत मुख्य भुमिकेत आहे. नर्गिस फाखरीवरुनही सोशल मिडियावर प्रश्चचिन्ह उपस्थित केलं जात आहे. मूळ पाकिस्तानची असलेल्या नर्गिसचा विरोध का केला जात नाही, असा सवाल सोशल मीडियावर विचारला जाऊ लागला आहे.