जैन मुनींच्या अंत्यविधीसाठी ११ कोटींची बोली!

मटा ऑनलाइन वृत्त । मुंबई

जैन मुनी आचार्य श्री प्रेमसूरजीस्वाजी यांचे रविवारी निधन झाले. त्यांच्या अंत्यविधीसाठी तब्बल ११ कोटी रुपयांची बोली लागली. एक सुप्रसिद्ध डाॅक्टर, बिल्डर आणि तीन उद्योगपतींनी मिळून ही बोली लावली. जैन मुनी आणि संतांच्या अंत्यसंस्कारांसाठी भरभक्कम रक्कम खर्च केली जाते. बोली लागण्याची ही पहिली वेळ नाही, मात्र ११ कोटींच्या रकमेने आधीचे सर्व विक्रम मोडित निघाले आहेत.

प्रेमसूरजीस्वाजी यांचे वय ९७ वर्षे होते. आपल्या कार्यकाळात त्यांनी देशभर हजारो अनुयायिंना दीक्षा दिली होती. सूत्रांच्या माहितीनुसार, न्युमोनिया आणि अन्य आजारांमुळे चर्नी रोड येथील सैफी रुग्णालयात रविवारी मध्यरात्री त्यांचं निधन झालं.

प्रतिष्ठित मुनींच्या अंतिम यात्रेचा एक भाग बनणं जैन समुदायात पुण्य समजले जाते. त्यामुळे या मुनींच्या चितेला अग्नी देण्यासह अन्य विधींसाठीदेखील बोली लावली जाते. यातून जमा झालेली रक्कम धार्मिक कार्यांसाठी वापरली जाते.

वाळकेश्र्वर इथल्या बाबू पन्नालाल जैन मंदिरात रविवारी दुपारी सुमारे ३ तास हा बोली लावण्याचा कार्यक्रम झाला. यात ११ कोटी ११ लाख ११ हजार १,११ रुपये अंत्यसंस्कारांसाठी जमा झाले.

प्रेमसूरजीस्वाजी यांचं पार्थिव रविवारी सायंकाळी शेकडो लोकांच्या उपस्थितीत पालखीतून अंत्यसंस्कारांसाठी नेण्यात आलं. सूत्रांनी दिलेल्या माहितीनुसार, मुनींच्या पार्थिवाला अग्नी देण्यासाठी ३०० किलो चंदनाची लाकडे वापरण्यात आली.