‘आरटीई’ प्रवेश; पालकांपुढे पेच

 शिक्षणमंत्र्यांनी ठेवले चुकीवर बोट

म. टा. प्रतिनिधी, मुंबई

शिक्षण हक्क कायद्यांतर्गत (आरटीई) प्रवेशासंदर्भात अनेक शाळांनी उत्पन्नाच्या दाखल्यात चूक ​दाखवत शहरातील जवळपास १३६ विद्यार्थ्यांना प्रवेश नाकारल्याचे समोर आले आहे. याप्रश्नी अखेर पालकांनी प्रवेशासाठी थेट शिक्षणमंत्री विनोद तावडे यांच्याकडे धाव घेतली आहे. परंतु पालकांनी चुकीची माहिती सादर केल्यानेच ही वेळ आल्याचे शिक्षणमंत्र्यांनी नमूद केल्याने पालकांसमोर मोठा पेच निर्माण झाला आहे.

गोरेगाव पूर्वेला असलेल्या गोकुळधाम, यशोधाम, लक्षधाम आणि सीटी इंटरनॅशनल शाळांमध्ये तीन वर्षांत शिक्षण हक्क अधिकार कायद्यानुसार २५ टक्के राखीव जागांवर १३६ मुलांना पहिलीत प्रवेश मिळाले होते. मात्र यातील काही पालकांच्या उत्पन्नाच्या दाखल्यांत चुका आढळल्याने व त्यासाठीच्या तक्रारी पोलिस ठाण्यापर्यंत गेल्याने या विद्यार्थ्यांचे प्रवेश संबंधित शाळांनी मेपासून नाकारले. तेव्हापासून हे पालक शिक्षणाधिकारी कार्यालयात रोज खेटे मारत आहेत. मात्र त्यांना तिथेही न्याय मिळत नसल्याने त्यांनी नुकतीच शिक्षणमंत्र्यांची भेट घेतली. या भेटीत मंत्र्यांनी पालकांच्याच चुकांवर बोट ठेवले. शाळांमध्ये उत्पन्नाचे दाखले तुम्हीच सादर केला होता. त्यामुळे तुमच्याच चुका असल्याने यावर आपण काही करू शकत नसल्याचे त्यांनी सांगितले. मात्र आपली भूमिका मांडण्याचा प्रयत्न केला असता, शिक्षणमंत्र्यांनी काहीही ऐकूण घेतले नसल्याचे पालकांकडून सांगण्यात आले.