RTI कार्यकर्ता हत्या; काँग्रेसच्या माजी नगरसेवकाला अटक

मटा ऑनलाइन वृत्त । मुंबई

ज्येष्ठ माहिती अधिकार कार्यकर्ते भूपेंद्र विरजी वीरा यांच्या हत्येप्रकरणी काँग्रेसचा माजी नगरसेवक रजा अब्बास खान आणि त्याचा मुलगा अमजद रजा खानला अटक करण्यात आली आहे. सुरुवातीला पोलिसांनी या दोघांना ताब्यात घेतलं होतं; पण चौकशीनंतर त्यांना अटक केली. या दोघांना २४ तारखेपर्यंत पोलीस कोठडी सुनावण्यात आली आहे. भूपेंद्र वीरा यांची हत्या सुपारी देऊन करण्यात आली असावी, असा पोलिसांचा संशय आहे.

शनिवारी रात्री भूपेंद्र वीरा यांची अज्ञात मारेकऱ्यांनी घरात घुसून गोळ्या झाडून हत्या केली होती. मालमत्तेसंबंधीच्या वादातून ही हत्या झाल्याचा प्राथमिक अंदाज आहे. रात्री टीव्ही पाहत असताना काही अनोळखी व्यक्ती वीरा यांच्या घरात शिरल्या आणि त्यांच्या डोक्यात गोळी झाडून पळ काढला. त्यानंतर वीरा यांना तातडीने व्ही. एन. देसाई हॉस्पिटलमध्ये नेण्यात आलं, पण डॉक्टरांनी त्यांना मृत घोषित केलं. या प्रकरणी वाकोला पोलिसांनी हत्येचा गुन्हा नोंदवून नऊ संशयितांना ताब्यात घेतलं होतं. त्यात रजा अब्बास खान आणि अमजद रजा खान हेही होते. या दोघांची रवानगी आता पोलीस कोठडीत झाली आहे.

दरम्यान, भूपेंद्र वीरा यांचे वाकोला येथे त्यांच्या रहात असलेल्या घराच्या ठिकाणी मालमत्तेवरून काही जणांशी वाद होते. जागामालकाच्या अनेक अनधिकृत बांधकामाबाबत आरटीआयअंतर्गत माहिती मिळवून भूपेंद्र यांनी पालिका प्रशासनाकडे तक्रार नोंदवली होती. यापैकी काही अनधिकृत बांधकामांवर हातोडा पडण्याची शक्यता होती. म्हणूनच, वीरा यांना दहा दिवसांपूर्वी घरासमोरील रस्त्यावर दहा अनोळखी व्यक्तींनी अडवून जिवे मारण्याची धमकी देण्यात आली होती. याबाबत त्यांनी वाकोला पोलिसात तक्रारही नोंदवली होती. त्यामुळे या वैमनस्यातूनच त्यांची हत्या झाली असावी, असं बोललं जातंय.