‘शेवटच्या श्वासापर्यंत धावायचे आहे’

७५ वर्षांच्या महादेव समजीस्करांकडून युवकांनी घेतली प्रेरणा

म. टा. प्रतिनिधी, मुंबई

झेपत नाही... थकायला होते... प्रयत्न करून पाहिला पण नाही जमत... पाय दुखतात... हल्लीच्या युवा पिढीकडून हमखास कानावर पडणारे हे शब्द. पण अशा तरुणांना लाजवेल असा सळसळता उत्साह घेऊन धावणारे महादेव समजीस्कर यांचा सत्कार करण्यात आला तेव्हा, ‘मला आयुष्याच्या शेवटच्या श्वासपर्यंत धावायचे आहे,’ या त्यांच्या वक्तव्याने अनेक युवकांनी प्रेरणा घेतली.

जागतिक युवा दिनानिमित्त ‘किप ऑन ‌‌र‌निंग संस्थे’तर्फे विलेपार्ले येथील साठ्ये महाविद्यालयात ‘फॅण्टास्टिक गप्पा’ हा अनोखा कार्यक्रम आयोजित केला होता. ‘महाराष्ट्र टाइम्स’ या कार्यक्रमाचा मीड‌यिा पार्टनर होता. मूर्तीमंत उत्साहाचे प्रतिक असलेले ७५ वर्षांचे महादेव समजीस्कर हे कार्यक्रमाचे केंद्रस्थान होते. अॅथलेटिक्स, गिर्यारोहण, कराटे, स्वीमिंगमध्ये प्रविण्य मिळवणाऱ्या समजीस्कर यांचे अनुभ‍व ऐकण्यासाठी सभागृहातील उपस्थ‌ति आतूर होते. त्यांनी ‘कम सप्टेंबर’ या इंग्रजी चित्रपटापासून प्रेरणा घेत वयाच्या ६२व्या वर्षी त्यांनी धावण्यास सुरुवात केली. ६३व्या वर्षी कराटे, ६५व्या वर्षी गिर्यारोहण व जलतरणाचे रिसतर प्रशिक्षण घेतले.

त्यांनी आतापर्यंत अनेक मॅरेथॉन्समध्ये भाग घेतला आहे. २००९मध्ये मुंबई मॅरेथॉनमध्ये त्यांनी पहिले सुवर्ण पदक पटकावले. त्यावेळी ८ क‌मिीची क्रॉस कंट्री त्यांनी अवघ्या ४५ मिनिटांमध्ये पूर्ण केली होती.

जीवनाचा आनंद

समजीस्कर यांची जीवनाची आनंद लुटण्याची व्याख्या म्हणजे धावणे. आयुष्याच्या शेवटच्या श्वासपर्यंत धावण्याची त्यांची इच्छा आहे. धावल्यावर अनेकांचे गुडघे दुखतात पण मी हे एक दिवस जरी धावलो नाहीत तर माझे गुडघे दुखतात, असे त्यांनी युवकांशी संवाद साधताना सांगितले. शारीरिक क्षमता वाढवा पण त्यापूर्वी प्रत्येकाने आपल्या शरीराची क्षमता जाणून घ्या, मगच पुढचे पाऊल उचला. तंत्रज्ञानाचा अतिरिक्त वापर टाळायला हवा, असा सल्लाही त्यांनी युवकांना दिला. २०१८च्या आशियाई चँपियनशीपमध्ये सुवर्णपदक पटकवण्याचे स्वप्न असल्याचे त्यांनी सांगितले. ‘किप ऑन र‌निंग’तर्फे एक व्यंगचित्र देऊन त्यांचा यावेळी सत्कार करण्यात आला. कार्यक्रमाच्या सुरुवातीला साठ्ये महाविद्यालयाचे उपमुख्याध्यापक डॉ. राजवाडे यांनी प्रो कॅमचे केविन परेरा यांचे स्वागत केले. समजीस्करांचा एका मॅरेथॉनमधील अंतिम रेषा पार करतानाचा फोटो व त्यावर इथियोपियन अॅथलिट हैले गेबरेसेललॅस्सी यांची स्वाक्षरी असलेली फ्रेम त्यांना भेट देण्यात आली.