सहारनपूर दलित अत्याचाराविरोधात निदर्शने

मटा ऑनलाइन वृत्त । मुंबई

बुलढाणा आणि उत्तर प्रदेशातील सहारनपूर येथे दलितांवर झालेल्या अत्याचाराच्या निषेधार्थ आज सकाळी ग्रँटरोड स्टेशनच्या बाहेर विविध पक्ष आणि संघटनांनी जोरदार निदर्शने केली. या निदर्शनानंतर माजी खासदार डॉ. भालचंद्र मुणगेकर यांच्या नेतृत्वाखालील शिष्टमंडळाने राजभवन येथे जाऊन राज्यपाल विद्यासागर राव यांना निवेदन सादर करून दोषींविरूद्ध कारवाई करण्याची मागणी केली. याप्रकरणात राष्ट्रपतींना लक्ष घालण्याची विनंती करण्याची मागणीही त्यांनी केली.

सहारनपूरमध्ये दलितांवर होणाऱ्या अत्याचारात वाढ होत असून या घटनांना आवर घालण्यात सरकारकडून टाळाटाळ होत आहे. मुख्यमंत्री योगी आदित्यनाथ यांचे सरकार आल्यानंतर सरकारच आपल्या पाठीशी असल्याच्या भावनेतून उच्चवर्णीयांकडून दलित,मुस्लिमांवर अत्याचार केले जात आहेत. महाराष्ट्रातही बुलढाणा येथे एका दलित महिलेची विवस्त्र धिंड काढण्यात आल्याच्या पार्श्वभूमीवर विविध संघटनांनी एकत्र येऊन आज निदर्शने केली. मुणगेकर यांच्या नेतृत्वाखाली राज्यपालांना भेटायला गेलेल्या या शिष्टमंडळात निवृत्त पोलीस महासंचालक सुधाकर सुराडकर, राष्ट्र सेवा दलाचे मुंबई अध्यक्ष शरद कदम, संविधान संवर्धन समितीच्या मुमताज शेख, ललित बाबर, उल्का महाजन, शैलेंद्र कांबळे, आशिष मेस्त्री, अच्युत भोईटे आणि विजय कुलकर्णी आदींचा समावेश होता.

संविधान संवर्धन समिती, राष्ट्र सेवा दल, समता अभियान, जातीअंत संघर्ष समिती, राष्ट्रीय दलित मानवाधिकार अभियान, सर्वहारा आंदोलन, सदभावना संघ, कचरा वाहतूक श्रमिक संघ, जनता दल, लाल निशाण पक्ष, सत्यशोधक ओबीसी संघटना, युवा क्रांती सभा, डी. वाय. एफ .आय., महाराष्ट्र युवा परिषद, नॅशनल ख्रिश्चन फोरम, प्रहार संघटना, मौलाना आझाद विचार मंच, इंडियन सोशल मुव्हमेंट, महाराष्ट्र मातंग एकता दल, दि बुद्धिष्ट शेड्युल कास्ट मिशन ऑफ इंडिया, गुंज एक आवाज,सिटीझन फॉर जस्टीस अँड पीस, एस. एफ. आय.चिराग प्रतिष्ठान आणि एन. सी. पी. डी. आदी संघटनांनी या निदर्शनात भाग घेतला. तसेच बँक कर्मचाऱ्यांचे नेते विश्वास उटगी, जनता दलाचे प्रभाकर नारकर, प्रफुल्लता दळवी, मधू मोहिते, विशाल हिवाळे, सुबोध मोरे, सुरेश सावंत, मिलिंद रानडे, युवराज मोहिते, उषाताई अंभोरे, वर्षा विद्या विलास, महादेव पाटील, राम कोंडाळकर, हिरामण खंडागळे, वैशाली जगताप आणि सीताराम शेलार आदी कार्यकर्ते-पदाधिकारी यावेळी उपस्थित होते.