म. टा. प्रतिनिधी, मुंबई
मराठी संगीत रंगभूमीवरील नटश्रेष्ठ मास्टर अनंत दामले (नूतन पेंढारकर) यांच्या स्मृतिप्रित्यर्थ त्यांची स्नुषा मृदुला दामले आणि साहित्य संघ मंदिर, गिरगाव यांच्या सहयोगाने ज्येष्ठ गायिका-अभिनेत्री रजनी जोशी आणि ज्येष्ठ गायक-नट अरविंद पिळगांवकर यांच्या सहस्रचंद्रदर्शन सोहळ्याचे आयोजन आज, शनिवारी करण्यात आले आहे. या शुभप्रसंगी मास्टर अनंत दामले यांच्या छायाचित्राचे अनावरण करून ते छायाचित्र साहित्य संघाला अर्पण केले जाणार आहे.
ज्येष्ठ गायिका-अभिनेत्री निर्मला गोगटे कार्यक्रमाच्या प्रमुख अतिथी म्हणून उपस्थित राहणार आहेत. या निमित्ताने मृदुला मोघे यांचा 'एकापेक्षा एक' हा एकपात्री बहुरूपी प्रयोग होणार आहे. त्याचबरोबर उदय चितळे यांनी संगीतबद्ध कलेल्या रंजना जोगळेकर आणि विनायक जोशी यांनी गायलेल्या अभिजात कवींच्या कवितांचा 'गीत नवे गाईन मी' हा कार्यक्रमही सादर केला जाणार आहे. हा कार्यक्रम सर्व रसिकांसाठी खुला असून प्रवेश विनामूल्य आहे. कार्यक्रम शनिवार, १० नोव्हेंबर रोजी दुपारी ४ ते संध्या. ७.१५ या वेळात गिरगाव येथील साहित्य संघात होणार आहे. यावेळी मराठी संगीत रंगभूमीवर प्रत्यक्ष अभिनय केलेल्या २२ दिग्गज रंगकर्मींच्या प्रत्यक्ष मुलाखती घेऊन लिहिलेले मृदुला दामले यांचे 'स्वर-रंग यात्री' हे पुस्तक सवलतीच्या दरात उपलब्ध असेल. या पुस्तकात अरविंद पिळगांवकर, रजनी जोशी आणि मास्टर अनंत दामले यांच्यावरील लेखांचाही समावेश आहे.