सेल्स एक्झिक्युटिव्हने केला क्लायंटच्या पत्नीवर बलात्कार

मुंबई: एका कारच्या कंपनीत काम करणाऱ्या सेल्स एक्झिक्युटिव्हने क्लायंटच्या पत्नीवर बलात्कार केल्याची धक्कादायक घटना मुंबईमध्ये घडली आहे. याप्रकरणी श्याम अभिमन्यू मसकेला अटक करण्यात आली असून पुढील तपास सुरू आहे.

पोलिसांनी दिलेल्या माहितीनुसार एका बिझनेस डीलसाठी पीडित महिला आरोपीला भेटली होती. या महिलेचा निरोप घेताना त्याने तिचं चुंबन घेतलं. तेव्हा तिने त्याकडे दुर्लक्ष केलं. त्यानंतर मसकेने तिला बाहेर फिरायला जाण्यासाठी बोलावलं. दोघंही बाहेर फिरायला गेल्यावर हॉटेलमध्ये तिच्या दारूमध्ये त्याने गुंगीच औषधं मिळवलं. नंतर त्याने तिच्यावर बलात्कार केला. तसंच या बलात्काराचं चित्रीकरणही केलं.

काही दिवसांनी मुंबईतील एका जॉगर्स ट्रॅकवर तो तिला पुन्हा भेटला. त्याने तिच्यासोबत बाहेर जाण्याची इच्छा व्यक्त केली. तिने नकार देताच त्याने तिला तो व्हिडिओ दाखवला. तसंच तिच्या पतीला व्हिडिओ पाठवीन असं सांगून तिला ब्लॅकमेलही केलं. भीतीपोटी तिने त्याला होकार दिला. मसकेने पीडित महिलेवर त्यानंतर दोन-तीनदा बलात्कार केला. या सगळ्या प्रकरणाचा त्या महिलेला फार मोठा धक्का बसला आणि तिने तीनदा आत्महत्या करण्याचा प्रयत्न केला. तिने दुसऱ्यांदा आत्महत्या करण्याचा प्रयत्न केला असता मसकेने व्हिडिओ डिलीट करीन असं वचन तिला दिलं. व्हिडिओ डिलीट मात्र केला नाही.

नंतर काही महिन्यांनी पुन्हा एकदा त्याने महिलेला त्रास देण्यास सुरुवात केली. अखेर महिलेनी हा सगळा प्रकार तिच्या पतीला सांगितला. तिच्या पतीने तक्रार दाखल केल्यानंतर आरोपीला त्याच्या माहिमच्या राहत्या घरातून अटक करण्यात आली.

पोलिसांनी मसकेचा मोबाईल जप्त केला असून त्यामध्ये त्यांना पीडित महिलेचे आक्षेपार्ह फोटो आणि व्हिडिओ सापडले आहेत.