सोशल मीडियावर लष्कराला सॅल्यूट

भारतीय लष्कर, मोदी सरकारवर नेटकरांचा अभिनंदनाचा वर्षाव

म. टा. प्रतिनिधी, मुंबई

भारताने पाकव्याप्त कश्मीरमध्ये घुसून दहशतवाद्यांचा खात्मा करीत उरी हल्ल्याचा बदला घेतल्यानंतर दुपारपासूनच सोशल नेटवर्किंग साइट्सवर भारतीय लष्करावर शुभेच्छांचा वर्षाव सुरू झाला. बॉलिवूड, क्रीडा, राजकारण, समाजकारण, साहित्य क्षेत्रातील सर्वांनीच मतभेद विसरून ठामपणे भारतीय लष्कराच्या कामगिरीची मुक्तकंठाने स्तुती केली. पाकिस्तानला सडेतोड उत्तर देणाऱ्या मोदी सरकारवरही शुभेच्छांचा पाऊस पडला. भारतीय लष्कराने, तर नेटकरांवर गारूड केल्याचे चित्र दिसले. सोशल नेटवर्किंग लोकप्रिय झाल्यानंतरचा हा पहिलाच युद्धसदृश प्रसंग नेटकरांनी खऱ्याअर्थाने सेलिब्रेट केला.

भारताने पाकिस्तानला कारवाईच्या माध्यमातून उत्तर दिल्याची माहिती लष्करी कारवायांचे महासंचालक लेफ्टनंट जनरल रणबीर सिंग यांनी दिल्यानंतर काही मिनिटांमध्येच #SurgicalStrike, #IndianArmy, #LineofControl, #DGMO यासारखे हॅशटॅग ट्विटर तसेच फेसबुकवर ट्रेण्डिंग झाले. हे हॅशटॅग दिवसभर ट्रेण्डिंग टॉपिक्स होते. तर त्याशिवाय अनेक नेत्यांनी #ModiPunishesPak हा हॅशटॅग वापरून मोदींनी घेतलेल्या या सहासी निर्णयाबद्दल त्यांचे अभिनंदन केले. औपचारिक अभिनंदनापासून ते गमतीदार अभिनंदनापर्यंत अनेक ट्विटस हजारोंच्या संख्येने रिट्विट आणि लाइक झाले.

‘दहशतवादाविरोधात कारवाई करण्याचे शौर्य गाजवणाऱ्या भारतीय लष्कराचे अभिनंदन’ असे ट्विट केंद्रीय गृहमंत्री राजनाथ सिंह यांनी केले. तर ‘मोहीम पार पाडल्याबद्दल भारतीय लष्कराचे अभिनंदन’ म्हणत ट्विटवरूनच संरक्षणमंत्री मनोहर पर्रीकर यांनी लष्कराला शाब्बासकी दिली. तर मुख्यमंत्री देवेंद्र फडणवीस यांनी ‘पंतप्रधान नरेंद्र मोदींनी भारत हा सशक्त देश असून, तो दहशवाद सहन करणार नाही हे दाखवून दिले.’ संपूर्ण देशाला भारतीय लष्कराचा आणि पंतप्रधान मोदींचा अभिमान वाटतो, असे ट्विट केले. दिल्लीचे मुख्यमंत्री अरविंद केजरीवाल यांनी ‘भारत माता की जय। पूरा देश भारतीय सेना के साथ है’, असे ट्विट केले. अनेक पक्षांच्या नेत्यांनी राजकीय मतभेद विसरून सरकारने दहशवाद्यांविरुद्ध केलेल्या कारावाईचे ट्विटवरून समर्थन करत भारतीय लष्कराचे तोंड भरून कौतूक केले.

भारताचा माजी क्रिकेटपटू वीरेंद्र सेहवागने पाकिस्तानी क्रिकेटपटूंचे ‘The boys have played really well’ हे वाक्य ट्विट करत मजेदार पद्धतीने भारतीय लष्कराला सॅल्यूट केला. या ट्विटला १० हजारहून अधिक रिट्विटस मिळाले. तर गानसम्राज्ञी लता मंगेशकर यांनी ‘मला आपल्या वीर जवानांचा, प्रधानमंत्री आणि रक्षामंत्र्यांचा अभिमान वाटतो. जय हिंद! वंदे मातरम्!’, असे ट्विट करत भारतीय लष्कराची पाठ थोपटली. त्यानंतर त्यांनी आपल्या ‘वंदे मारतम्’ गाण्याची युट्यूब लिंकही ट्विट केली. तर देशभक्तीपर सिनेमांमध्ये काम करणारा ‘खिलाडी’ हिरो अक्षय कुमारनेही ‘लष्कराच्या कारवाईचा अभिमान वाटतो’, असे ट्विट करत सरकारनेही कारवाई करण्याचा निर्णय घेतल्याबद्दल आनंद व्यक्त केला.

डिजिटल सेलिब्रेशन

भारताने पाकिस्तानला धडा शिकवण्यासाठी काहीतरी करावे अशी इच्छा नेटवरून मागील अनेक दिवसांपासून व्यक्त करणाऱ्यांनी गुरुवारी या हल्ल्यानंतर जणू सोशल नेटर्किंग साइट्सवर डिजिटल सेलिब्रेशनच केले. ही कारवाई कशी झाली, भारतीय लष्कर कसे शक्तिशाली आहे, पाकिस्तानसंदर्भातील व्यंगचित्रे, भारताने पाकिस्तानला कसा धोबीपछाड दिला त्याबद्दलच्या मजेदार जीफ इमेजेस आणि फोटो अनेकांनी सोशल साइट्सवर पोस्ट करत भारतीय लष्कराला सलाम केला. तसेच या लष्करी कारवाईनंतर अनेकांनी फेसबुकवर पंतप्रधान कार्यलयाच्या पेजला पाचपैकी पाच रेटिंग दिले.