संगीत नाटक अकादमी पुरस्काराने सन्मान

हृदयनाथ मंगेशकर, प्रदीप मुळ्ये, शफाअत खान, शांता गोखले यांचा समावेश

म. टा. प्रतिनिधी, मुंबई

केंद्र शासनाचे २०१५ या वर्षांसाठीचे ‘संगीत नाटक अकादमी’ पुरस्कार जाहीर झाले असून यात ज्येष्ठ संगीतकार पं. हृदयनाथ मंगेशकर, नेपथ्यकार प्रदीप मुळ्ये, समीक्षक शांता गोखले, नाटककार शफाअत खान, लावणी नृत्यांगना छाया व माया खुटेगावकर, अभिनेते मनोज जोशी, अभिनेत्री हिमानी शिवपुरी आदींचा समावेश आहे.

संगीत, नाटक, नृत्य आदी विविध विभागांसाठी हे पुरस्कार तसेच शिष्यवृत्ती संगीत नाटक अकादमी देते. प्रत्येकी १ लाख रुपये आणि ताम्रपट असे या पुरस्काराचे स्वरूप असून, देशभरातील ४३ गुणी कलाकारांची या पुरस्कारासाठी निवड करण्यात आली आहे. ‘अकादमी रत्न’ या पुरस्कारासाठी सी. चंद्रशेखर यांची निवड झाली आहे. हा पुरस्कार ३ लाख रुपये व ताम्रपट अशा स्वरूपाचा आहे.

उस्ताद बिस्मिल्ला खान युवा पुरस्कारासाठी नाविद इनामदार (नेपथ्य), दीपलक्ष्मी मोघे (अभिनय), उमेश खंदारे (रंगभूषा), प्रल्हाद कदम (लोककला) यांची निवड झाली आहे.

गेली ३५ वर्षे मी थिएटरची पूजा करतो आहे. या पूजेतील हे चंदन आहे, असे मला वाटते. कोणत्याही रंगकर्मींसाठी संगीत नाटक अकादमीचा पुरस्कार सर्वोच्च स्थानी असतो. मला अतिशय आनंद झाला आहे.

-मनोज जोशी, अभिनेता

मराठीत नाटककारांची संख्या जास्त आहे. आपल्याकडे वेगवेगळ्या पद्धतीने नाटके लिहिणारे नाटककार आहेत. इतर प्रांतात हे प्रमाण कमी आहे. हे लक्षात घेऊन मराठी नाटककाराला हा पुरस्कार मिळाला, हे महत्त्वाचे वाटते. शिवाय, नाट्यलेखनासह नेपथ्यकारालाही हा पुरस्कार मिळाल्याने यानिमित्ताने देशाचे लक्ष पुन्हा मराठी रंगभूमीकडे गेले तरी खूप होईल.

-शफाअत खान, नाटककार

नेपथ्यासाठी हा पुरस्कार मिळाला याचा मला आनंद आहे. या निमित्ताने बॅकस्टेज आर्टिस्टच्या कामाची व त्यांच्या योगदानाची दखल घेतली गेली. माझे गुरू द.ग. गोडसे यांच्यानंतर नेपथ्यासाठी हा पुरस्कार मराठीत मला मिळाला आहे, याचेही समाधान वाटते.

-प्रदीप मुळ्ये, ज्येष्ठ नेपथ्यकार