संजय गांधी उद्यानात 'आरटी-१'चे आगमन

मुंबई : चंद्रपूर जिल्ह्यातील राजुरा वनक्षेत्रात बंदिस्त करण्यात आलेल्या आणि त्यानंतर गोरेवाडा येथे ठेवण्यात आलेल्या 'आरटी-१' या सात वर्षे वयाच्या नर वाघाला शनिवारी सकाळी संजय गांधी राष्ट्रीय उद्यानात आणण्यात आले. या वाघाने तीन दिवस प्रवास केला. त्याची प्रकृती उत्तम असून सध्या त्याला विलगीकरणात ठेवले आहे. त्यानंतर त्याचे पुढील व्यवस्थापन करण्यात येईल.

चंद्रपूरच्या राजुरामध्ये २७ ऑक्टोबरला या वाघाला पकडण्यात आले होते. या वाघाने जानेवारी २०१९पासून आठ नागरिकांना मारले होते आणि तिघांना जखमी केले होते, असे सांगण्यात येते. त्याला पकडण्यासाठी फेब्रुवारी २०२०पासून प्रयत्न सुरू होते. अखेर ऑक्टोबरमध्ये त्याला पकडण्यात यश आले. स्वयंचलित पिंजऱ्याच्या मदतीने या वाघाला वनविभागाने पकडले त्यानंतर त्याला नागपूरच्या गोरेवाडा वन्यप्राणी बचाव केंद्रामध्ये ठेवण्यात आले.

या वाघाला संजय गांधी राष्ट्रीय उद्यान येथे आणण्याची परवानगी प्रधान मुख्य वन संरक्षक यांच्या अध्यक्षतेखालील समितीने दिल्यानंतर उद्यानातील पथकाने त्याला मुंबईमध्ये आणले. त्याचा सुमारे तीन दिवस प्रवास सुरू होता. प्रवासाचा ताण होऊ नये यासाठी वाघाला वेळोवेळी विश्रांतीही देण्यात आली होती. उद्यानामध्ये आणल्यावर वाघाची तपासणी करण्यात आली असून त्याची प्रकृती उत्तम असल्याचे उद्यान प्रशासनाने स्पष्ट केले.

विलगीकरणामध्ये त्याचे निरीक्षण करून पुढील निर्णय घेण्यात येईल. सध्या उद्यानामध्ये गेल्या महिन्यात दाखल झालेल्या एक वर्षाच्या वाघिणीसह पाच वाघिणी आहेत, तर सुलतान हा पाच वर्षांचा नर वाघ आहे.