सिंह सफारीतील एकमेव सिंह 'जेस्पा'चे निधन; संजय गांधी राष्ट्रीय उद्यानातच झाला होता जन्म

मुंबई : संजय गांधी राष्ट्रीय उद्यानातील सिंह सफारीतील एकमेव सिंह जेस्पाचे रविवारी निधन झाले. तो ११ वर्षांचा होता. जेस्पाचा संजय गांधी राष्ट्रीय उद्यानातच जन्म झाला होता. तो अनेक दिवसांपासून आजारी होता. यामुळे सिंह सफारीही बंद ठेवण्यात आली होती. त्याच्यावर पशु वैद्यकांच्या मार्गदर्शनाखाली उपचार सुरू होते. मात्र त्याने उपचारांना प्रतिसाद दिला नाही, अशी माहिती संजय गांधी राष्ट्रीय उद्यानातर्फे देण्यात आली.

जेस्पाचा जन्म २२ सप्टेंबर २०११मध्ये झाला. तो संकरित प्रजातीतील सिंह होता. त्याचे शवविच्छेदन मुंबई पशु वैद्यकीय महाविद्यालयाचे तज्ज्ञ डॉ. गाढवे यांनी केले. शवविच्छेदनाच्या अहवालात अंतर्गत अवयव निकामी होणे, अशक्तपणा यामुळे त्याचा मृत्यू झाल्याचे स्पष्ट झाले आहे. शवविच्छेदनाचा अहवाल आल्यानंतर त्याच्या मृतदेहाचे दहन करण्यात आल्याचे उद्यान प्रशासनाने सांगितले.