आम्ही पोकळ धमक्या देत नाही, थेट कृती करतो; राऊतांचा कंगनाला इशारा

मुंबई: मुंबईशी संबंध नसलेल्या कोणत्याही एैऱ्यागैऱ्यांनी वक्तव्य करू नये, असं सांगतानाच आम्ही शिवसैनिक आहोत. केवळ पोकळ धमक्या देत नाहीत, तर थेट कृती करतो, असा इशारा शिवसेना नेते संजय राऊत यांनी अभिनेत्री कंगना राणावत हिचं नाव न घेता दिला.

प्रसारमाध्यमांशी बोलताना संजय राऊत यांनी कंगनाचं नाव न घेता जोरदार हल्ला चढवला. माझं नाव घेऊन कुणाला पब्लिसिटी स्टंट करायचा असेल तर खुशाल करा. पण मुंबई तुम्हाला पोसते. सर्व काही देते. ज्या मुंबईने हुतात्मे दिले. त्या मुंबई आणि मुंबई पोलिसांबद्दल कोणीही उठून काहीही बोलू शकत नाही. आम्ही ते खपवून घेणार नाही. आम्ही शिवसैनिक आहोत. पोकळ धमक्या देत नाही. थेट कृती करतो, असा इशारा संजय राऊत यांनी दिला. मुंबईबाबत काहीही बरळणाऱ्या अशा मेंटल केसेस आरोग्य खात्याने हाताळाव्यात. मुंबई पोलिसांनी त्याबाबत कठोर पावलं उचलावीत. अशा पागल लोकांना जे पक्ष पाठिंबा देत आहेत. त्या पक्षांना पाकव्याप्त काश्मीरने मदतान केलं आहे का? तुम्हाला पाकिस्तानी लोकांनी मतदान केलं आहे का? मुंबई पोलीस हे पाकिस्तानचे पोलीस आहेत का? ज्या मुंबई पोलिसांनी अतिरेकी हल्ले परतवून लावून मुंबईचं संरक्षण केलं ते लोक काहीही बरळणार आहेत का? असा सवाल करतानाच झाशीची राणी आणि छत्रपती शिवाजी महाराज हे आमची अस्मिता आहे. ड्रग्सच्या गुळण्या करून आणि नशेच्या अंमलात कुणी स्वत:ला झाशीची राणी समजत असेल आणि अशा व्यक्तिला कोणी पाठिंबा देत असेल तर देशाचं राष्ट्रीयत्व किती खालच्या पातळीवर गेलं हे दिसून येतं, असंही ते म्हणाले.

याला धमकी समजा किंवा सल्ला... कंगनाला 'मनसे' स्टाइल इशारा

माझा कुणावरही व्यक्तिगत राग नाही. पण झाशीच्या राणीशी कुणाची तुलना करणं हा झाशीच्या राणीचा घोर अपमान आहे. आधी शिवाजी महाराजांचा अपमान केला. आता झाशीच्या राणीचा अपमान करणाऱ्या कोणत्या हिंदुत्वाच्या गप्पा मारत आहेत, असा सवाल करतानाच राम कदम यांच्याबाबत भाजपनं भूमिका स्पष्ट केली पाहिजे, अशी मागणीही त्यांनी केली.

'कंगना राणावतचे बोलविते धनी देवेंद्र फडणवीस व भाजप'

माझ्याबरोबर माझ्या कुटुंबाचीही नार्को टेस्ट करा, पण... राम कदम यांचं आव्हान