माढ्यातून संजय शिंदे?

म. टा. प्रतिनिधी, मुंबई

शह काटशहाच्या राजकारणामुळे पश्चिम महाराष्ट्रातील एकेकाळचे बडे प्रस्थ विजयसिंह मोहिते पाटील आणि त्यांचे चिरंजीव रणजीतसिंह मोहिते पाटील हे राष्ट्रवादी काँग्रेसपासून दूर जाण्याची लक्षणे आहेत. राजकीय वर्चस्व टिकविण्यासाठी मोहिते पाटील सत्ताधारी पक्षाच्या कळपात आश्रय घेतील असे संकेत आहेत. तसे झाल्यास माढा लोकसभा मतदारसंघातील राष्ट्रवादी काँग्रेसची उमेदवारी ज्येष्ठ माजी सनदी अधिकारी प्रभाकर देशमुख यांच्याऐवजी राष्ट्रवादीचे आ. बबनदादा शिंदे यांचे बंधू संजय शिंदे यांच्या पदरात पडेल, अशी राष्ट्रवादीच्या नेतेमंडळीत चर्चा आहे.

राष्ट्रवादी काँग्रेसचे नेते अजितदादा पवार आणि विजयसिंह मोहिते पाटील यांच्यात गेल्या काही महिन्यांपासून सहकारातील राजकीय वर्चस्वासाठी सुप्त संघर्ष सुरू असून, त्याची परिणती मोहिते पाटील नाराज होण्यात झाल्याचे बोलले जाते.

माजी मुख्यमंत्री वसंतदादा पाटील यांच्या गटाचे कट्टर समर्थक म्हणून विजयसिंह मोहिते पाटील हे पूर्वी ओळखले जायचे. त्यामुळे काँग्रेसच्या राजवटीत अनेकदा त्यांना महत्वाच्या खात्याच्या कॅबिनेट मंत्रीपद भूषविण्याची संधी मिळाली आहे. सोलापूर जिल्ह्यातील इंदापूरनजीक महाकाय उजनी धरणाच्या जलाशयातील पाण्याचे शेतीसाठी सिंचन करून त्यांनी मोठ्या प्रमाणावर अकलूजच्या माळरानावर ऊसाची शेती, दुधदुभत्या जनावरांमुळे दूध डेअरी व्यवसाय, फलोत्पादन या माध्यमातून चार साखर कारखाने व दूध डेअऱ्या निर्माण केल्या आहेत. सहकाराच्या माध्यमातून सोलापूर जिल्ह्याच्या राजकारणावर त्यांनी काही काळ वर्चस्व गाजविले होते.

नंतरच्या काळात राष्ट्रवादी काँग्रेसमध्ये दुसऱ्या फळीतील नेत्यांमध्ये वर्चस्वाची लढाई सुरू झाली. सोलापूर जिल्ह्यात अजितदादा पवार यांनी लक्ष घालून आ. बबनदादा शिंदे, त्यांचे भाऊ संजयमामा शिंदे, दीपक आबा साळुंके, प्रभाकर देशमुख असे शिलेदार निर्माण केले. माढा लोकसभा मतदारसंघात मराठा समाजाचे प्राबल्य असून, त्यानंतर धनगर समाजातील मतदारांची याठिकाणी निर्णायक ताकद आहे. मध्यंतरी विजयसिंह मोहिते पाटील यांच्या ताब्यातील चार सहकारी साखर कारखाने आणि दूध डेअऱ्या अशा संस्था आर्थिकदृष्ट्या डबघाईस आल्या होत्या. काही संस्थांवर जप्तीची कारवाई करण्याचे संकेत सहकार विभागाकडून गेले होते. त्यातच नाराज असलेले मोहिते पाटील कुटुंब लोकसभेसाठीसाठी तिकीट मिळत नसल्यामुळे रुसले होते. त्याचवेळी विजयसिंह मोहिते पाटील यांचे पक्षांतर्गत विरोधक असलेल्या गटांचे राजकीय बळ वाढत चालले होते.

भविष्यातील राजकीय साठमारी टाळण्यासाठी विजयसिंह मोहिते पाटील व त्यांचे पुत्र लोकसभेच्या तोंडावर वेगळी वाट धरण्याची शक्यता आहे. तसे झाल्यास राष्ट्रवादी काँग्रेस प्रभाकर देशमुख आणि संजयमामा शिंदे या दोन नावांपैकी संजयमामा यांना माढा येथील किल्ला शाबूत राखण्यासाठी उमेदवारी देतील अशी माहिती सूत्रांकडून समजते.