मुंबई पोलिसांची कौतुकास्पद कामगिरी; जीवन संपवण्याच्या मनःस्थितीत असलेल्या विद्यार्थ्याला वाचविले

म. टा. खास प्रतिनिधी, मुंबई : वैद्यकीय शिक्षण घेणारा एका विद्यार्थी आत्महत्या करण्याच्या विचारात आहे, अशी माहिती अमेरिकेतून इंटरपोलला मिळाली. हा विद्यार्थी भारतामधील असल्याचे समजल्याने इंटरपोलमार्फत ही माहिती मुंबई पोलिसांपर्यंत पोहोचली. पोलिसांनी तांत्रिक माहितीच्या आधारे या विद्यार्थाचा शोध घेतला असता तो पुण्याच्या एका कॉलेजमध्ये शिक्षण घेत असल्याचे समजले. मुंबई पोलिसांचे पथक पुण्यापर्यंत पोहोचले आणि त्याला आत्महत्या करण्यापासून परावृत्त केले. अमेरिकेहून पुण्याची माहिती मुंबईपर्यंत पोहोचली आणि एका विद्यार्थ्याचा जीव वाचला.

असा आहे प्रकार

पुणे येथील एका नामांकित वैद्यकीय महाविद्यालयात शिक्षण घेणाऱ्या एक विद्यार्थी मानसिक तणावाखाली होता. अमेरिकेतील तणावमुक्त करणाऱ्या संस्थेची माहिती त्याने गुगलवर शोधली. त्यावेळी त्याला अमेरिकेतील एक संस्थेची माहिती मिळाली. या संस्थेच्या संकेतस्थळावरून तो या संस्थेच्या पदाधिकाऱ्यांसोबत संवाद साधत सुरु होता. तणावाखाली असून घाबरल्यासारखे होते, मला जगायचे नाही आहे, आत्महत्येचा सोपा मार्ग सांगा असे तो वारंवार बोलत होता. संस्थेच्या पदाधिकाऱ्यांनी त्याचे मन वळविण्याचा, त्याला आत्महत्येपासून परावृत्त करण्याचा प्रयत्न केला. परंतु तो ऐकण्याच्या मनस्थितीत नव्हता. जवळपास तीन ते चार तास त्याच्यासोबत संवाद साधल्यानंतर तो जीवाचे बरेवाईट करण्याची भीती असल्याने या संस्थेच्या पदाधिकाऱ्यांनी पोलिसांनी माहिती दिली. पोलिसांनी अमेरिकेतील भारतीय दूतावासाला माहिती दिली. दूतावासाने ही माहिती इंटरपोलला पुरवली आणि तिथून मुंबई पोलिसांपर्यंत आली.


आयपी अॅड्रेसच्या साह्याने ठावठिकाणा

विद्यार्थ्याला आत्महत्येपासून परावृत्त करणे आणि त्याच्यापर्यंत अल्पावधीत पोहोचणे गरजेचे होते. या विद्यार्थ्यांचा मोबाइल क्रमांकही नसल्याने शोधताना अडचणी येत होत्या. अखेर आयपी अॅड्रेसच्या तांत्रिक पुराव्यांवरून मुंबई पोलिसांच्या सीआययूचे पथक पुण्यापर्यंत पोहोचले. या विद्यार्थ्याचे वडील कर्नाटक पोलिसांत हवालदार पदावर कार्यरत आहेत.