घोटाळ्यांच्या चौकशीसाठी काँग्रेस राज्यपालांकडे

मुंबई ः मुंबई महापालिकेत सत्तेवर असलेल्या शिवसेना भाजप युतीचे रस्ते, नालेसफाई, टॅब असे घोटाळे उजेडात आले असून त्याची चौकशी करण्यात राज्य सरकार टाळाटाळ करीत आहे, त्यामुळे राज्य सरकारला या घोटाळ्यांच्या चौकशीचे आदेश द्यावेत, अशी मागणी मुंबई काँग्रेसचे अध्यक्ष संजय निरुपम यांच्या नेतृत्वाखालील शिष्टमंडळाने राज्यपाल सी. विद्यासागर राव यांच्याकडे सोमवारी केली.

मुंबई महापालिकेतल्या शिवसेना भाजप युतीची भ्रष्टाचाराची प्रकरणे चव्हाट्यावर आली आहेत. परंतु, जे भ्रष्टाचारात गुंतले आहेत, तसेच या कंत्राटाचे कमिशन ज्यांना मिळाले आहेत, त्यांची चौकशी करण्यात सरकार चालढकल करत आहे, अशी तक्रार निरुपम यांनी मांडली.