५वी, ८वीच्या शिष्यवृत्ती परीक्षेचे निकाल आज

म. टा. विशेष प्रतिनिधी, मुंबई

महाराष्ट्र राज्य परीक्षा परिषदेकडून फेब्रुवारीमध्ये घेण्यात आलेल्या इयत्ता पाचवी आणि आठवीच्या शिष्यवृत्ती परीक्षेचे अंतरिम निकाल आज (गुरुवार) दुपारी तीन वाजता जाहीर करण्यात येणार आहे. विद्यार्थ्यांना हा निकाल www.mscepune.in आणि http://puppss.mscescholershipexam.in या परिषदेच्या वेबसाइटवर पाहता येईल. शाळांना त्यांचा निकाल त्यांच्या 'लॉग इन'द्वारे; तर पालकांना आपल्या पाल्याचा निकाल वेबसाइटवर पाहता येणार आहे, अशी माहिती परिषदेचे आयुक्त तुकाराम सुपे यांनी सांगितले.

विद्यार्थ्यांना गुणपडताळणी करायची असल्यास संबंधित शाळांच्या 'लॉग इन'मध्ये १६ ते २७ मे या कालावधीत ऑनलाइन अर्ज उपलब्ध करून देण्यात येणार आहे. गुणपडताळणीच्या प्रत्येक पेपरसाठी ५० रुपये शुल्क ऑनलाइन पद्धतीने भरता येतील. कालावधीत प्राप्त झालेल्या अर्जांची गुणपडताळणी केल्यानंतर निकाल ३० दिवसांपर्यंत कळविण्यात येणार आहे. त्यानंतर अंतिम निकाल आणि गुणवत्ता यादी प्रसिद्ध करण्यात येणार आहे, असे सुपे यांनी सांगितले.