शाळेला मिळाली बालदिनाची भेट!

माजी विद्यार्थ्यांनी साकारली ई-लर्निंगची व्यवस्था

म. टा. प्रतिनिधी, मुंबई

मुंबईपासून हाकेच्या अंतरावर असूनही जिल्हा परिषद शाळांची अवस्था आजही बिकट आहे. याचेच एक उदाहरण म्हणजे नेरळ येथील कोदिवले गावातील जिल्हा परिषदांची शाळा. एकीकडे अत्याधुनिक सोयी सुविधांनी सज्ज शाळांची संख्या वाढत असताना दुसरीकडे मात्र या शाळांत सुविधांची वानवाच होती. शाळेची ही परिस्थिती बदलण्यासाठी शाळेतील माजी विद्यार्थ्यांनी पण केला आणि तो पूर्णही केला. या माजी विद्यार्थ्यांनी आपल्या शाळेसाठी ई- लर्निंगची व्यवस्था सुरू करून शाळेचे रूपच बदलून टाकत मंगळवारच्या बालदिनी शाळेला अनोखी भेट दिली.

नेरळ येथील कोदिवले गावातील जिल्हा परिषद शाळेची अवस्था फारशी चांगली नव्हती. या शाळेत पहिली ते पाचवीपर्यंत वर्ग असून मोडक्या फळ्यावरच शिक्षणाचे धडे दिले जात होते. हीच बाब गावातील तरुणांना समजताच त्यांनी पुढाकार घेऊन निधी उभा करून ई-लर्निंग व संगणक साधनांची अनोखी आधुनिक भेट बालदिनाचे औचित्य साधत शाळेकडे सुपूर्द केली. शाळेतील संगणक आणि ई-लर्निंगची साधने पाहून शाळेतील मुलांचा आनंद गगनात मावेनासा झाला.

शाळेच्या मुख्याध्यापिका नांगरे यांनी १५ ऑगस्ट रोजी माजी विद्यार्थ्यांकडे या संदर्भात विषय मांडला व शाळा डिजिटल झाल्यास मुलांना आतापासूनच आधुनिक शिक्षणाची ओळख होईल आणि इंग्रजी माध्यमाकडे पालकांचा कल कमी करता येऊ शकेल, तसेच शाळेची पटसंख्या वाढवण्यास मदत होईल, अशी भावना व्यक्त केली. ज्या शाळेतून आपल्या शैक्षणिक आयुष्याचा श्रीगणेशा केला त्याविषयी कृतज्ञता म्हणून काहीतरी केल्याचं समाधान मिळेल, या हेतूने राजेद्र सोनावळे, सुभाष सोनावळे, अरविंद तरे, भास्कर तरे आणि प्रल्हाद राणे या व इतर माजी विद्यार्थ्यांनी यासाठी पुढाकार घेऊन ही सोय उपलब्ध करून दिली आहे.