म. टा. खास प्रतिनिधी, मुंबई
दादर येथील शिवाजी पार्क मैदानात आज, गुरुवारी होणाऱ्या शपथविधी सोहळ्यासाठी येणाऱ्या महत्त्वाच्या व्यक्ती आणि गर्दी पाहता मुंबई पोलिसांनी कडक सुरक्षा कवच पुरविले आहे. कोणताही अनुचित प्रकार घडू नये याकरिता सुरक्षिततेच्या पार्श्वभूमीवर पोलिस ठाण्याचा स्थानिक बंदोबस्त, सशस्त्र दल, राज्य राखीव पोलिस दल, दंगल नियंत्रण पथक, जलद प्रतिसाद पथक, बॉम्बशोधक आणि नाशक पथक, मुंबई वाहतूक विभाग आणि जवळपास २ हजार अतिरिक्त पोलिस अधिकारी आणि कर्मचारी असा बंदोबस्त तैनात करण्यात येणार आहे. गर्दीच्या ठिकाणी सुरक्षेच्या दृष्टीने सीसीटीव्हीद्वारे नजर ठेवण्यात येणार आहे. तसेच साध्या वेशात पोलिसांची गस्त असेल. वाहतूक शाखेकडून वाहतुकीचे नियमन करण्यात येणार आहे.