प्रेयसीसाठी अपहरणाचा बनाव

मुंबई : गरीब प्रेयसीच्या आर्थिक मदतीसाठी अल्पवयीन प्रियकराने स्वतःच्या अपहरणाचा बनाव रचल्याप्रकरणी गुन्हे शाखेच्या पोलिसांनी ताब्यात घेतले आहे. मित्राच्या मदतीने या मुलाने वडिलांकडेच ५० लाखांची खंडणी मागितली होती. गुन्हे शाखा १०च्या पोलिसांनी हा सर्व बनाव उघडकीस आणला.

साकीनाका परिसरात राहणाऱ्या १६ वर्षीय मुलाचे त्याच परिसरातील एका अल्पवयीन मुलीशी प्रेमसंबध होते. मात्र मुलीची घरची आर्थिक स्थिती नाजूक होती. त्यामुळे तिला अनेक अडचणींना तोंड द्यावे लागत होते. तिच्यावर येणाऱ्या अडचणी न बघवल्याने या मुलाने मित्राच्या मदतीने स्वतःचे अपहरण झाल्याचा बनाव रचला. मित्रांना सांगून त्याने वडिलांकडे ५० लाखांची मागणी केली. मुलाचे अपहरण झाल्याचे कळल्यानंतर हादरलेल्या वडिलांनी पोलिसांत धाव घेतली. पोलिसांनी हे प्रकरण गुन्हे शाखेकडे वर्ग केले. त्यानंतर तपासात मुलाच्या वडिलांना येणारे फोन पालघर येथून येत असून तो फोन त्या मुलाच्या मित्राचा असल्याचे लक्षात आले. त्यातून पोलिसांनी पालघर येथील मनोर, लक्ष्मी रेसिडन्सी येथे छापा टाकून अपहरण झालेल्या मुलासह मित्राला ताब्यात घेतले.