डॉफिनची विक्री की एक्स्चेंज?

हेलिकॉप्टरबाबत मंत्रिमंडळात चर्चा

म. टा. विशेष प्रतिनिधी, मुंबई

राज्य सरकारच्या मालकीच्या डॉफिन या हेलिकॉप्टरच्या देखभाल व दुरुस्तीसाठी येणारा खर्च व दुरुस्तीनंतरची या हेलिकॉप्टरची अल्प उपयुक्तता पाहता हे हेलिकॉप्टर विकायचे किंवा त्याच्या बदल्यात नवे हेलिकॉप्टर घ्यायचे का, या विषयावर गुरुवारच्या मंत्रिमंडळ बैठकीत चर्चा होणार असल्याचे कळते.

राज्य सरकारने फ्रान्समधल्या युरोकॉप्टर कंपनीकडून २००१मध्ये सुमारे २३ कोटी रुपयांना डॉफिन हेलिकॉप्टर घेतले होते. त्यानंतर सुमारे दहा वर्षे हे हेलिकॉप्टर तत्कालीन राज्यपाल तसेच मुख्यमंत्र्यांकडून वापरण्यात आले. सुमारे २ हजार २०१ उड्डाण तास या हेलिकॉप्टरने पूर्ण केले आहेत. मात्र त्यानंतर गेली पाच वर्षे हे हेलिकॉप्टर बिनावापर उभे आहे. त्यानंतर या हेलिकॉप्टरचा पुनर्वापर करण्याबाबत २०१६मध्ये विचार करण्यात आला. मात्र दुरुस्तीसाठी १८ कोटी रुपये खर्च येणार असल्याने यासंदर्भातील विचार बाजूला पडला होता.

अलिकडेच मुख्यमंत्री देवेंद्र फडणवीस यांच्या हेलिकॉप्टरसंदर्भात एकदा अपघात तर एकदा हेलिकॉप्टर नादुरुस्त असल्याचा प्रकार उघडकीस आल्यानंतर डॉफिन हेलिकॉप्टरचे काय करायचे याविषयी पुन्हा चर्चा सुरू झाली आहे. या हेलिकॉप्टरची दुरुस्ती करून हे हेलिकॉप्टर उड्डाण सक्षम बनविले, तरीही त्याचे वय १८ वर्षे असेल. मात्र नागरी विमान महासंचालकांच्या निकषानुसार १५ वर्षे जुने कोणतेही हेलिकॉप्टर अतिमहत्त्वाच्या व्यक्तींसाठी वापरता येणार नाही. त्यामुळेच या हेलिकॉप्टरची विक्री करायची, या हेलिकॉप्टरच्या बदल्यात नवे हेलिकॉप्टर घ्यायचे, त्यासाठी कशा निविदा काढायच्या, याबाबत मंत्रिमंडळाच्या बैठकीत चर्चा होणार असल्याचे कळते.