म. टा. प्रतिनिधी, मुंबई
सहज अभिनय आणि शालीनता अशी ओळख असलेल्या ज्येष्ठ अभिनेत्री विद्या सिन्हा यांचे गुरुवारी अल्पशा आजाराने निधन झाले. त्या ७२ वर्षांच्या होत्या. हृदय व फुफ्फुसाच्या विकाराने त्रस्त असलेल्या सिन्हा यांच्यावर जुहू येथील खासगी रुग्णालयात उपचार सुरू होते. प्रकृती चिंताजनक असल्याने त्यांना व्हेंटिलेटरवर ठेवण्यात आले होते.
अमोल पालेकर यांच्यासोबतचा त्यांचा 'छोटी सी बात' हा चित्रपट प्रेक्षकांच्या विशेष आवडीचा ठरला. त्याशिवाय 'रजनीगंधा', 'पती, पत्नी और वो', 'तुम्हारे लिए', 'सफेद झूठ', 'मुक्ती', 'सबूत' अशा गाजलेल्या चित्रपटांत झळकलेल्या विद्या सिन्हा यांची मनोरंजनसृष्टीत स्वत:ची वेगळी ओळख निर्माण केली होती. काव्यांजली, कुल्फी कुमार बाजेवाला, भाभी, बहुरानी, कबूल है, चंद्र नंदिनी या टीव्ही मालिकांमध्येही त्यांनी काम केले होते. 'कुल्फी कुमार बाजेवाला' मालिकेतील त्यांची बेबे ही भूमिका विशेष गाजली. मधल्या काळात त्या बॉलिवूडपासून दूर होत्या. बऱ्याच वर्षांनी त्या सलमान खानच्या बॉडीगार्ड चित्रपटात दिसल्या होत्या.
विद्या सिन्हा यांचे दोन विवाह झाले होते. व्यकंटेश्वर अय्यर यांना घटस्फोट दिल्यानंतर त्यांनी नेताजी भीमराव साळुंखे यांच्याशी दुसरा विवाह केला होता. मात्र, तोही फार काळ टिकला नाही. साळुंखे यांच्या विरोधात त्यांनी मानसिक व शारीरिक छळाची तक्रार दाखल केली होती. त्यामुळे त्या अचानक चर्चेत आल्या होत्या.