‘निरुपम हटाओ’ला जोर

मुंबई: मुंबई काँग्रेसचे अध्यक्ष संजय निरुपम यांना पदावरून हटवण्याच्या मोहिमेला जोर आला आहे. पक्षातील सर्व प्रमुख गटांच्या नेत्यांनी रविवारी मुंबईत अखिल भारतीय काँग्रेस समितीचे सरचिटणीस व महाराष्ट्राचे प्रभारी मल्लिकार्जुन खरगे यांची भेट घेऊन निरुपम यांच्याऐवजी मिलिंद देवरा यांना मुंबई काँग्रेसचे अध्यक्ष बनवावे, अशी मागणी केली.

निरुपम यांच्या एककल्ली कारभाराविरोधात अनेक दिवस मुंबई काँग्रेसमध्ये असंतोषाचे वातावरण आहे. त्या पार्श्वभूमीवर काँग्रेस आमदार नसिम खान, अमिन पटेल, वर्षा गायकवाड, भाई जगताप तसेच माजी खासदार एकनाथ गायकवाड, माजी आमदार बाबा सिद्दीकी, माजी मंत्री कृपाशंकर सिंग, काँग्रेसचे पालिकेतील नेते रवी राजा, माजी आमदार युसूफ अब्राहनी, माजी आमदार मधू चव्हाण आदी सर्व गटांच्या प्रमुख नेत्यांनी खरगे यांची भेट घेतली.

मुंबई महापालिकेत काँग्रेसचा धुव्वा उडाल्यानंतर तरी निरुपम यांची उचलबांगडी केली जाईल, अशी काँग्रेस कार्यकर्त्यांना आशा होती. मात्र तत्कालीन प्रभारी मोहनप्रकाश यांचा वरदहस्त असल्यामुळे निरुपम अध्यक्षपद टिकवण्यात यशस्वी ठरले. मात्र येऊ घातलेल्या लोकसभा व त्याच्या बरोबरीनेच होऊ शकणाऱ्या विधानसभा निवडणुकांचे बिगुल वाजू लागले असताना मुंबईत काँग्रेसचा जनाधार मोठ्या प्रमाणावर घटल्याचे दिसत आहे. स्वतः उत्तर भारतीय असलेले निरुपम मुंबईतील उत्तर भारतीय जनाधारही परत मिळवू शकलेले नाहीत.

कुरघोडींना येणार ऊत

मुंबईत काँग्रेसची परिस्थिती सुधारायची असेल, तर नेतृत्वबदल आवश्यक असून आम्ही सर्वजण या पदासाठी देवरा यांचे नाव सुचवत असल्याचे या शिष्टमंडळाने खरगे यांना सांगितले. त्यानंतर खरगेंनी ही बाब पक्षनेतृत्वाच्या कानावर घालू असे स्पष्ट केले आहे. नेतृत्वबदल मागणाऱ्या या शिष्टमंडळाला १९ सप्टेंबरला पक्षाध्यक्ष राहुल गांधी यांनीही वेळ दिल्याचे समजते. या पार्श्वभूमीवर आता मुंबई काँग्रेसांतर्गत राजकीय कुरघोड्यांना ऊत येणार असल्याचे जाणकारांचे म्हणणे आहे.