'रमेश कदम यांची १३५ कोटींची संपत्ती जप्त करा'

मटा ऑनलाइन वृत्त। मुंबई

अण्णाभाऊ साठे महामंडळातील घोटाळ्याप्रकरणी सध्या अटकेत असलेले राष्ट्रवादी काँग्रेसचे निलंबित आमदार रमेश कदम यांना मुंबई सेशन कोर्टाने मोठा दणका दिला आहे. रमेश कदम यांची १३५ कोटी १६ लाख ८२ हजार ६०८ रुपयांची जंगम आणि स्थावर मालमत्ता जप्त करण्यात यावी असे आदेशच मुंबई सेशन कोर्टाच्या विशेष न्यायालयाने आज दिले आहेत.

रमेश कदम यांची ही संपत्ती जप्त करण्याची जबाबदारी गुन्हे अन्वेषण विभागाकडे आहे. जप्त करावयाच्या या मालमत्तेत शेती, प्लॉट, औरंगाबादमधील मालमत्ता आणि २० ते २५ बँक अकाउंट्स अशा एकूण ५४ मालमत्ता जप्त करण्याचे आदेश कोर्टाने दिले आहेत.

अण्णाभाऊ साठे महामंडळात २५० कोटी रुपयांचा गैरव्यवहार झाला आहे. या घोटाळ्याबाबत अटकेत असलेले निलंबित आमदार रमेश कदम यांनी ४०० कोटींपेक्षा अधिक रुपयांचा घोटाळा केला असल्याचे म्हटले जात आहे. रमेश कदम यांच्यावर या घोटाळ्याचा थेट आरोप करत आपण ३७०० पानी पुरावे आपण लाचलुचपत विभागासह इतर अनेक विभागांना दिले असल्याचा दावा माजी मंत्री लक्ष्मणराव ढोबळे यांनी केला आहे.