पहिल्याच पावसात मुंबईची तुंबई; लोकल ठप्प, वाहतूक कोंडीमुळं मुंबईकरांचे हाल

मुंबईत आणि उपनगरात आज सकाळपासूनच जोरदार पावसाला सुरुवात झाली. दादर, कुर्ला, सायन, मुलुंड, माटुंगा, हिंदमाता, अंधेरी, घाटकोपर, गोरेगाव, मालाड, जोगेश्वरी, कांदिवली, बोरिवली, गोवंडी या भागामध्ये पावसाने जोरदार हजेरी लावली. मुंबईतील दादर हिंदमाता, सायन, किंग्ज सर्कल, माटुंगा, अंधेरी सबवे आणि कुर्ला परिसर जलमय झाला आहे.

दरवर्षीच्या पावसाळ्यात हमखास पाणी साचून नागरिकांची प्रचंड गैरसोय होणाऱ्या सखल भागांपैकी एक म्हणजे हिंदमाता परिसर. या पावसातही हिंदमाता परिसरात प्रथेप्रमाणे जलमय झाला आहे. हिंदमातामध्ये तर दोन ते तीन फूट पाणी भरल्याने येथील वाहतूक कोंडी झाली आहे. अनेक वाहनांमध्ये पाणी शिरल्यानं वाहनंही बंद झाली आहेत.

मुंबई शहरासह उपनगरातही पावसानं धुमाकुळ घातलं आहे. दहिसर येथील चेकनाका येथे पाणी साचल्यानं प्रवाशांना या साचलेल्या पाण्यातून वाट काढावी लागली आहे. अलीकडेच मुंबईतील निर्बंध शिथिल करण्यात आले आहेत. त्यामुळं अनेक नागरिक कामासाठी बाहेर पडले आहेत. मात्र, जोरदार पावसामुळं नागरिकांची तारांबळ उडाली आहे.

रेल्वे रुळावरही पाणी साचल्याने त्याचा अत्यावश्यक सेवेतील कामगारांना मोठा फटका बसला आहे. रेल्वे रुळावर पाणी साचल्याने मध्य आणि हार्बर रेल्वेची वाहतूक विस्कळीत झाली आहे. कुर्ला आणि सीएसएमटी दरम्यानची मध्य रेल्वे बंद झाली आहे. तर हार्बर रेल्वेवरील वाशी- ते सीएसएमटी वाहतूक पुढील सुचनेपर्यंत बंद ठेवण्यात येणार आहे. पश्चिम मार्गावरील अंधेरी- सीएसएमटी वाहतूकही ठप्प झाली आहे. त्यामुळे अत्यावश्यक सेवेतील कामगारांचे हाल झाले आहेत. पावसामुळे सखल भागात पाणी साचल्याने बेस्टनेही वाहतुकीचे आठ मार्ग बदलले आहेत.

सायन, किंग्ज सर्कल, हिंदमाता याठिकाणी मोठ्याप्रमाणावर पाणी साचले आहे. त्यामुळे वाहनांना पाण्यातून वाट काढणे अवघड झाले आहे. परिणामी या भागात वाहतूक कोंडी पाहायला मिळत आहे. पश्चिम द्रुतगती मार्ग व पूर्व द्रुतगती मार्गावर मोठ्या प्रमाणात वाहतूक कोंडी झाली होती. मुसळधार पावसामुळं दृष्यमानता कमी झाल्यानं वाहतूकीचा वेग मंदावला होता. मुंबई लोकल बंद असल्यानं नोकरदार वर्गानं रस्ते वाहतूकीचा पर्याय निवडला आहे. त्यामुळं महामार्गावर वाहतूक कोंडी झाली आहे.