- एकाच निविदाकाराला द्यावे लागले काम
- खिंडीपाडा येथे मलनिःसारण वाहिनी २०१५पासून प्रस्तावित
म. टा. विशेष प्रतिनिधी, मुंबई
स्पर्धात्मक निविदा नसल्याने अखेर तीन वर्षांपूर्वीच्या एकमेव निविदाकाराला भांडुप येथील मलनि:सारण वाहिन्या टाकण्याचे काम महापालिकेला द्यावे लागले आहे. या तीन वर्षांच्या कालावधीत कंत्राट दरातही मोठी वाढ झाली असून पालिकेला अपेक्षित असलेल्या खर्चापेक्षा तब्बल २८ टक्के जादा दराने काम देण्याची वेळ पालिकेवर आली आहे.
भांडुप पश्चिमेकडील खिंडीपाडा येथे ३०० मिमी व ४५० मिमी व्यासाच्या दोन मलनि:सारण वाहिन्या टाकण्याचे काम २०१५ पासून पालिकेने प्रस्तावित केले होते. २०१५मध्ये मे. माय असोसिएट या कंत्राटदाराकडून एकमेव निविदा आल्याने निविदा प्रक्रिया रद्द करून २०१७मध्ये पुन्हा निविदा मागवण्यात आली. त्यावेळी दोन कंत्राटदारांनी त्यात भाग घेतला. मात्र त्यावेळेस मे. स्पेको इन्फ्रास्ट्रक्चर हा एकमेव कंत्राटदार पात्र ठरला. त्याने निविदेत पालिकेने अंदाजित केलेल्या दरापेक्षा १२८ टक्के जादा दराने निविदा भरली. पालिकने दराबाबत वाटाघाटी करूनही दर कमी न केल्याने ती निविदा प्रक्रिया रद्द करून पुन्हा निविदा मागवण्यात आल्या.
सन २०१७ मध्ये पुन्हा मागवलेल्या निविदांमध्ये २०१५ मधील एकमेव निविदाकार मे. माय असोसिएटने ४८.९६ टक्के जादा दर भरल्याने व त्यात तो दर कपात करण्यास तयार नसल्याने पुन्हा ती निविदा प्रक्रिया रद्द करण्यात आली. त्यानंतर जुलै २०१८मध्ये पुन्हा तिसऱ्यांदा निविदा मागविण्यात आल्या. त्यात मे. माय असोसिएटने ४५ टक्के जादा दर भरल्याने त्याच्याशी वाटाघाटी करण्यात आल्या व ४५ टक्क्यांवरून दर २७. ८७ टक्के इतका कमी करण्यात पालिकेला यश आहे. त्यामुळे २ कोटी ९४ लाख रुपये दराने अंदाजित केलेले काम ९७ लाख रुपये जास्त दराने म्हणजेच ३.९२ कोटी रुपयांत देण्याचा निर्णय पालिकेने घेतला आहे. या कंत्राटदाराला पात्र ठरवून त्यालाच कंत्राट देण्याचा निर्णय आता घेण्यात आला आहे. या आठवड्यात होणाऱ्या स्थायी समितीच्या बैठकीत हा प्रस्ताव मांडण्यात आला असून त्यास विरोध झाल्यास हे काम पुन्हा रखडण्याची शक्यता आहे.