पवार की मोदी, आवडता नेता कोण? अमोल कोल्हेंच्या प्रश्नावर राज ठाकरेंनी दाखवलं चातुर्य, म्हणाले...

मुंबई : महाराष्ट्रात मुख्यमंत्रीबदलाच्या चर्चांनी राजकीय वातावरण ढवळून निघालं आहे. सुप्रीम कोर्टात सुरू असलेल्या शिवसेनेतील अंतर्गत संघर्षावरील खटल्याच्या निकालानंतर राज्यात नवी राजकीय समीकरणं उदयास येण्याबाबत तर्क-वितर्क लढवले जात आहेत. अशातच काल मनसे अध्यक्ष राज ठाकरे यांची एका मराठी वृत्तपत्राच्या व्यासपीठावर खासदार अमोल कोल्हे आणि उपमुख्यमंत्री देवेंद्र फडणवीस यांच्या पत्नी अमृता फडणवीस यांनी घेतलेली जाहीर मुलाखत चांगलीच गाजली. यावेळी राज ठाकरे यांनी आपल्या नेहमीच्या शैलीत उत्तरं देत जोरदार फटकेबाजी केली. याच मुलाखतीत राज ठाकरे यांना तुमचा आवडता नेता कोण, असा प्रश्नही विचारण्यात आला. या प्रश्नावर उत्तर देताना राज ठाकरे यांनी राजकीय चातुर्य दाखवल्याचं पाहायला मिळालं.

अमोल कोल्हे यांनी रॅपिड फायर राऊंडदरम्यान राज ठाकरे यांना तुमचा आवडता नेता कोण, असा प्रश्न विचारत पंतप्रधान नरेंद्र मोदी की राष्ट्रवादीचे अध्यक्ष शरद पवार, असे दोन पर्याय दिले. या प्रश्नावर उत्तर देताना राज ठाकरे यांनी आपल्या नेहमीच्या शैलीत एक पॉझ घेतला आणि म्हणाले की, 'खरंतर तसं कोणी नाही. याचं कारण म्हणजे मी आजपर्यंत ज्यांना मानत आलो, ज्यांच्याकडे पाहात आलो ती व्यक्ती बाळासाहेब आहेत. मोदी आणि पवार यांच्याकडे बघताना आवडणं याच्यापेक्षा मी त्यांच्या कामाची तुलना करेन. ते दोघेही कामाला वाघ आहेत. नरेंद्र मोदी असतील किंवा शरद पवार असतील... एखादी भूमिका जर आवडत नसेल तर आपण थेट त्या व्यक्तीवर फुल्या मारत नाही. मी जेव्हा नरेंद्र मोदी किंवा शरद पवार यांच्यावर टीका करत असतो तेव्हा मी त्यांच्या भूमिकेवर टीका करत असतो, ती टीका भूमिकेवर असते, व्यक्तीवर नाही,' अशा शब्दांत राज ठाकरे यांनी आपलं मत व्यक्त केलं.



अजित पवार बाहेर जेवढं लक्ष ठेवतायत, तेवढंच लक्ष त्यांनी काकांकडे पण द्यायला हवं: राज ठाकरे

'शिंदे की फडणवीस....आवडता मुख्यमंत्री कोण?'

राज ठाकरे यांना कालच्या जाहीर मुलाखतीत एकनाथ शिंदे की देवेंद्र फडणवीस... आवडता मुख्यमंत्री कोण, असाही प्रश्न विचारण्यात आला होता. यावर राज यांनी सावधपणे उत्तर दिल्याचं पाहायला मिळालं. 'एकनाथ शिंदे आताच मुख्यमंत्री झाले आहेत. त्यामुळे मुख्यमंत्री म्हणून ठसा उमटवायला त्यांना वेळ द्यावा लागेल. मात्र महाराष्ट्राच्या राजकारणात प्रभावशाली मुख्यमंत्री म्हणून पाहायला गेलं तर विलासराव देशमुख, देवेंद्र फडणवीस, शरद पवार यांची नावं घ्यायला लागतील. मनोहर जोशी यांनीही मुख्यमंत्रिपदी असताना आब राखला होता, मात्र कामाचा झपाटा म्हणाल तर तो नारायण राणेंकडे होता,' असं म्हणत राज ठाकरेंनी आपल्या आवडत्या मुख्यमंत्र्यांविषयी भाष्य केलं.