शरद पवार यांनी घेतली करोनावरील लस; केलं 'हे' आवाहन

मुंबईः आजपासून देशात करोना लसीकरणाचा तिसरा टप्पा सुरु झाला असून तिसऱ्या टप्प्यात ६० वर्ष पूर्ण केलेल्या जेष्ठ नागरिकांचे लसीकरण करण्यात येत आहे. आज सकाळीच पंतप्रधान नरेंद्र मोदी यांनी दिल्लीत करोना प्रतिबंधक लसीचा पहिला डोस घेतला. त्यानंतर आज दुपारी राष्ट्रवादी काँग्रेसचे अध्यक्ष शरद पवार यांनीही करोना प्रतिबंधक लसीचा पहिला डोस घेतला आहे. राष्ट्रवादी काँग्रेसचे अध्यक्ष शरद पवार यांनी आज दुपारी तीनच्या दरम्यान मुंबईतील रुग्णालयात करोनावरील लस घेतली. शरद पवारांनी सोशल मीडियाच्या माध्यमातून ही माहिती दिली आहे. तसंच, लसीकरणाचा एक व्हिडिओही पोस्ट केला आहे. 'आज मुंबईतील जे.जे. रुग्णालयात करोनाची लस घेतली. आजपासून तिसऱ्या टप्प्यातील करोना लसीकरणाला सुरुवात झाली आहे. ही लस घेण्यास पात्र असलेल्या ज्येष्ठ नागरिकांनी लवकरात लवकर लस घेऊन करोना विरुद्धच्या लढ्यात सहभाग नोंदवावा, असे आवाहन करतो, असं शरद पवार यांनी म्हटलं आहे.


दरम्यान, राष्ट्रवादीच्या खासदार सुप्रिया सुळे यांनीही आज जे. जे रुग्णालयात करोनावरील लस घेतली आहे. त्यांनीही एक ट्वीट केलं आहे. 'रुग्णालयाच्या कर्मचारी श्रद्धा मोरे यांनी आज करोनावरील लस दिली. सरकारने आजपासून तिसऱ्या टप्प्यातील लसीकरणास सुरुवात केली आहे. आपणही नोंदणी करुन लस आवश्य टोचून घ्यावी,' अशी विनंती सुळेंनी केली आहे.

वाचाः मंदी असतानाही शासनाकडून चांगलं कामः राज्यपाल

पंतप्रधान मोदींनीही घेतली करोनावरील लस

पंतप्रधान नरेंद्र मोदी यांनीही आज सकाळी सात वाजता दिल्लीमधील ऑल इंडिया इन्स्टिट्युट ऑफ मेडिकल सायन्सेस (एम्स) रुग्णालयामध्ये लसीचा पहिला डोस घेतला. 'एम्स रुग्णालयात करोनाचा पहिला डोस घेतला. करोनाविरोधातील जागतिक लढाईला बळ देण्यासाठी आपल्या डॉक्टर आणि वैज्ञानिकांनी ज्या जलगतीने काम केलं ते कौतुकास्पद आहे,' असं नरेंद्र मोदींनी म्हटलं आहे.

वाचाः मोदी हे सरळमार्गी नेते; संजय राऊतांकडून पंतप्रधानांचे कौतुक