शरद पवार इन अॅक्शन; उद्या रायगड, रत्नागिरीची पाहणी करणार

मुंबई: निसर्ग चक्रीवादळामुळे रायगड आणि रत्नागिरी या दोन्ही जिल्ह्यांचं प्रचंड नुकसान झालं आहे. त्यामुळे राष्ट्रवादीचे अध्यक्ष शरद पवार या दोन्ही जिल्ह्यांच्या नुकसानीची पाहणी करणार आहेत. उद्यापासून दोन दिवस पवार कोकण दौऱ्यावर जाणार आहेत.

शरद पवार हे उद्या ९ जून रोजी रायगड आणि १० जूनला रत्नागिरी जिल्ह्यातील नुकसानग्रस्त भागाची पाहणी करून शेतकऱ्यांच्या भेटी घेऊन संपूर्ण माहिती घेणार आहेत. पवार हे उद्या ९ जून रोजी सकाळी ८.३० वाजता मुंबईतून गाडीने प्रयाण करणार आहेत. सकाळी ११. ३० वाजता माणगाव, १२.३० वाजता म्हसळा, १ वाजता दिवेआगार, २ वाजता श्रीवर्धन, ४ वाजता श्रीवर्धन आदी भागांची पाहणी करतील. त्यानंतर आमदार, खासदार आणि अधिकाऱ्यांसोबत बैठक घेऊन नुकसानीचा आढावा घेतील. त्यानंतर सायंकाळी ५ वाजता हरिहरेश्वर आणि नंतर ६ वाजता बागमांडला मार्गे दापोलीकडे रवाना होणार आहेत. दापोली येथे ते मुक्काम करणार आहेत.

दुसऱ्या दिवशी सकाळी म्हणजे १० जून रोजी रत्नागिरी जिल्ह्यातील नुकसानीची पाहणी करतील. दापोलीतील नुकसानीची पाहणी केल्यानंतर रत्नागिरीतील काही गावांना ते भेटी देऊन येथील स्थानिकांशी चर्चा करतील. यावेळी ते अधिकाऱ्यांशी चर्चा करून नुकसानीची माहिती घेतील. यावेळी राष्ट्रवादीचे नेते, खासदार सुनिल तटकरे, रायगडच्या पालकमंत्री आणि विधी व न्याय राज्यमंत्री आदिती तटकरे व स्थानिक आमदार उपस्थित राहणार आहेत.

लॉकडाऊन उठताच मनसे आक्रमक; नवी मुंबईत बंद पाडली लॅब

दरम्यान, निसर्ग चक्रीवादळामुळे रायगड जिल्ह्याचे प्रचंड नुकसान झाले होते. त्यामुळे मुख्यमंत्री उद्धव ठाकरे यांनी रायगड जिल्ह्याची पाहणी करून नुकसानीचा आढावा घेतला होता. मुख्यमंत्र्यांनी मच्छिमार, शेतकरी आणि स्थानिकांशी चर्चा करून त्यांची नुकसानीची माहिती घेतानाच त्यांची विचारपूसही केली होती. त्यानंतर त्यांनी रायगडसाठी १०० कोटींचे अर्थसहाय्य जाहीर केले होते.

मुंबईत 'या' ठिकाणी आणखी दोन हजार खाटांची 'जम्बो फॅसिलिटी'