अॅड. आंबेडकरांनी 'धर्मनिरपेक्षता' शिकवू नयेः पवार

मुंबई

शरद पवार हे धर्मनिरपेक्ष आहेत. परंतु, त्यांचा राष्ट्रवादी काँग्रेस पक्ष धर्मनिरपेक्ष नाही. संभाजी भिडे यांची पिलावळ राष्ट्रवादी काँग्रेसमध्ये अधिक आहे, त्यामुळे राष्ट्रवादीसोबत जाण्यात अडचण आहे, असं म्हणणाऱ्या भारिप बहुजन महासंघाचे नेते अॅड. प्रकाश आंबेडकर यांना राष्ट्रवादीचे अध्यक्ष शरद पवार यांनी प्रत्युत्तर दिले आहे. भाजपला मदत करणाऱ्या प्रकाश आंबेडकर यांनी धर्मनिरपेक्षता आम्हाला शिकवू नये, असं पवारांनी म्हटलं आहे.

राष्ट्रवादी काँग्रेस हा पक्ष धर्मनिरपेक्ष नसता तर अकोल्यातील दोन निवडणुकीत प्रकाश आंबेडकरांनी राष्ट्रवादीचा पाठिंबा घेतला नसता. प्रकाश आंबेडकर हे मला आधी धर्मनिरपेक्ष वाटायचे, पण आता वाटत नाहीत, असंही शरद पवार म्हणाले. ईशान्य मुंबईत आमच्या उमेदवाराचा पराभव करण्यासाठी प्रकाश आंबेडकरांनी त्यांच्या पक्षात असलेल्या नीलम गोऱ्हे यांना निवडणुकीत उभे केले होते. आंबेडकरांच्या या निर्णयामुळे भाजपच्या प्रमोद महाजन यांना थेट फायदा मिळाला होता, असे पवार म्हणाले.

प्रकाश आंबेडकरांवर टीका केल्यानंतर शरद पवार यांनी सरसंघचालक डॉ. मोहन भागवत यांच्यावरही निशाणा साधला. मुस्लिमाशिवाय हिंदुत्व अपुरे आहे. असं सांगणाऱ्या भागवत यांच्यावर पवार यांनी जोरदार टीका केली. मुस्लिम, ख्रिश्चन हे सर्व जण देशाचे घटक आहेत. आपल्याला जितका अधिकार आहे. तितकाच अधिकार त्यांना सुद्धा आहे. ते देशाचे हिस्सेदार आहेत, हे कुणी सांगण्याची गरज नाही, असा टोला पवार यांनी मोहन भागवत यांना लगावला आहे.