चंद्रकांत पाटलांना धक्का; महत्त्वाची खाती फडणवीसांकडे, शिंदे गटाच्या अनेकांना प्रमोशन

मुंबई: राज्य मंत्रिमंडळातील नवनियुक्त मंत्र्यांचं खातेवाटप मुख्यमंत्री एकनाथ शिंदे यांनी जाहीर केलं आहे. सामान्य प्रशासन, नगर विकास, माहिती व तंत्रज्ञान अशी खाती शिंदे यांनी स्वत:कडे ठेवली आहेत. तर उपमुख्यमंत्री देवेंद्र फडणवीस यांच्याकडे गृह, अर्थ आणि नियोजन, गृहनिर्माण अशा महत्त्वाच्या खात्यांची जबाबदारी देण्यात आली आहे.

गेल्या आठवड्यात १८ आमदारांनी मंत्रिपदाची शपथ घेतली. यामध्ये भाजप आणि शिंदे गटातील प्रत्येकी ९ जणांचा समावेश होता. शपथविधीवेळी सर्वात आधी भाजप नेते राधाकृष्ण विखे-पाटील यांना शपथ देण्यात आली. त्यामुळे त्यांना महत्त्वाची खातं देण्यात येईल अशी शक्यता होती. विखे पाटील यांना चांगली खाती देण्यात आली आहेत. महसूल, पशुसंवर्धन आणि दुग्धविकास मंत्रालयांचा कार्यभार त्यांच्याकडे सोपवण्यात आला आहे.
एकनाथ शिंदे यांच्याकडे नगरविकास तर फडणवीसांकडे अर्थ आणि गृह, खातेवाटपात भाजपच मोठा भाऊ
फडणवीस सरकारमध्ये अर्थ आणि वन मंत्रालय सांभाळणाऱ्या सुधीर मुनगंटीवारांना यावेळी अर्थ मंत्रालय देण्यात आलेलं नाही. त्यांना वनं, सांस्कृतिक कार्य आणि मत्स्य व्यवसाय विभाग देण्यात आले आहेत. महसूल मंत्रिपद भूषवलेल्या चंद्रकांत पाटील यांच्याकडे कमी महत्त्वाची खाती देण्यात आली आहेत. उच्च व तंत्रशिक्षण, वस्त्रोद्योग आणि संसदीय कार्य विभागांचा कार्यभार त्यांच्याकडे देण्यात आला आहे. फडणवीसांचे विश्वासू अशी ओळख असलेल्या गिरीश महाजन यांच्याकडे ग्राम विकास, पंचायती राज, वैद्यकीय शिक्षण, क्रीडा व युवक कल्याण अशी महत्त्वाची खाती देण्यात आली आहेत.

एकनाथ शिंदे गटातील अनेकांना प्रमोशन मिळालं आहे. उदय सामंत यांना उद्योग मंत्रालय देण्यात आलं आहे. अब्दुल सत्तार यांच्याकडे कृषी मंत्रालयासारखं महत्त्वाचं खातं सोपवण्यात आलं आहे. शंभुराज देसाई यांच्याकडे राज्य उत्पादन शुल्क मंत्रालय देण्यात आलं आहे. मविआ सरकारमध्ये वन मंत्रिपदाचा राजीनामा द्यावा लागलेल्या संजय राठोड यांना प्रमोशन मिळालं आहे. त्यांना अन्न आणि औषध प्रशासन देण्यात आलं आहे. तर गुलाबराव पाटील यांच्याकडे पाणीपुरवठा आणि स्वच्छता मंत्रालयाची जबाबदारी देण्यात आली आहे.