'अजूनही वेळ गेलेली नाही; 'या' फॉर्म्युल्यावर शिवसेना-भाजप युती होऊ शकते'

मुंबई: राज्याचे मुख्यमंत्री उद्धव ठाकरे यांनी शुक्रवारी औरंगाबादमध्ये केलेल्या एका वक्तव्यावरून शिवसेना-भाजपच्या संभाव्य युतीच्या चर्चेला नव्यानं तोंड फुटलं आहे. याच पार्श्वभूमीवर केंद्रीय सामाजिक न्याय राज्यमंत्री रामदास आठवले यांनी युतीबद्दल सकारात्मक वक्तव्य केलं आहे. 'अजूनही वेळ गेलेली नाही, अडीच-अडीच वर्षांच्या फॉर्म्युल्यावर युती होऊ शकते,' असा आशावाद त्यांनी व्यक्त केला आहे. (Ramdas Athawale on Shiv Sena-BJP Alliance)

एका न्यूज पोर्टलला दिलेल्या मुलाखतीत ते बोलत होते. मुख्यमंत्री उद्धव ठाकरे यांच्या स्वभावाचे त्यांनी तोंडभरून कौतुक केले. 'उद्धव ठाकरे यांना मुख्यमंत्री होण्याची इच्छा नव्हती. मात्र, त्यांनी मांडलेल्या अडीच-अडीच वर्षाच्या प्रस्तावावर शिवसेना-भाजपमध्ये एकमत होऊ शकलं नाही. त्यामुळं जे व्हायला नको होतं, ते झालं. काँग्रेस-राष्ट्रवादीच्या सोबत त्यांनी आघाडी करणं योग्य नव्हतं,' असं आठवले म्हणाले. 'उद्धव ठाकरे हे अत्यंत साधेभोळे आणि चांगले गृहस्थ आहेत. बाळासाहेब ठाकरे यांचे खरे वारसदार आहेत. त्यांनी पुन्हा एकदा महायुतीत यावे. पंतप्रधान नरेंद्र मोदी यांच्यासोबत त्यांचे संबंध अत्यंत चांगले आहेत. अजूनही वेळ गेलेली नाही. त्यांनी पुन्हा स्वगृही परतावे,' असा सल्ला आठवले यांनी दिला. 'उद्धव ठाकरेंनी महायुतीत यावे आणि देवेंद्र फडणवीसांचे गीत गावे... फडणवीसांनी एक दिवस मातोश्रीवर जावे आणि उद्धवजींना घेऊन परत यावे,' अशी कविताही आठवले यांनी बोलून दाखवली.

वाचा: उद्धव ठाकरे अचानक युतीबद्दल कसे बोलले?; नीतेश राणेंना वेगळीच शंका

देवेंद्र फडणवीस यांचंही आठवले यांनी कौतुक केलं. 'फडणवीस हे अभ्यासू आहेत. विरोधी पक्षाचे नेते म्हणून ते विविध प्रश्नांवर भूमिका मांडत आहेत. आता त्यांनी उद्धव ठाकरे यांच्यासोबत जुळवून घ्यावं. त्यांना अडीच वर्षे मुख्यमंत्रिपद द्यावं,' असंही आठवले म्हणाले. राष्ट्रवादी काँग्रेसचे अध्यक्ष शरद पवार यांनीही एनडीएमध्ये यावं, अशी अपेक्षाही त्यांनी एका प्रश्नाच्या उत्तरात व्यक्त केली.

वाचा: मुंबई लोकलवर विषारी गॅस हल्ला करण्याचा कट? सुरक्षेत मोठी वाढ