भाजपचा विजय सत्ता, संपत्तीच्या जोरावर!

मटा ऑनलाइन वृत्त । मुंबई

भाजपने सत्ता, साधन आणि संपत्ती पणाला लावली होती. त्यामुळे त्यांना मिळालेल्या यशाची मोजणी त्याआधारेच करायला हवी, अशी तोफ शिवसेना पक्षप्रमुख उद्धव ठाकरे यांनी डागली आहे. मुंबईत शिवसेनाच सर्वात मोठा पक्ष आहे. पुढचा महापौर शिवसेनेचाच असेल, असा दावाही उद्धव यांनी केला आहे. विशेष म्हणजे उद्धव यांच्या पत्नी रश्मी याही प्रथमच पत्रकार परिषदेत उपस्थित होत्या.

मुंबईत शिवसेना ८४ जागा जिंकून सर्वात मोठा पक्ष झाला असला तरी कोणत्याही पक्षाला मुंबईकरांनी स्पष्ट बहुमत दिलेलं नसल्याने मुंबईत सत्ता कुणाची, हा प्रश्न सध्या कळीचा ठरला आहे. या पार्श्वभूमीवर निकालानंतर अत्यंत सावध प्रतिक्रिया देताना उद्धव यांनी पुढच्या गणितांबाबत कोणतेही पत्ते खोलले नाहीत.

उद्धव यांनी मुंबईतील मराठी मतदारांचे जाहीर आभार मानले. यावेळी शिवसेनेला उत्तर भारतीय मतंही मिळाली आहेत. बेहरामपाड्यासारख्या भागातून शिवसेनेचा उमेदवार जिंकला आहे. मुस्लिम मतदारही शिवसेनेकडे वळत आहेत, असेही त्यांनी नमूद केले.

शिवसेनेची २५ वर्षे युतीत सडली असे वक्तव्य उद्धव यांनी भाजपसोबतची युती तोडताना केलं होतं. त्याअनुशंगाने प्रश्न विचारला असता हे निकाल ही एक सुरुवात आहे. भाजपवर मात करायला आणखी थोडा वेळ लागेल, अशी प्रतिक्रिया त्यांनी दिली.

मतदार यादीत घोळ घालणाऱ्यांना शिक्षा करा: उद्धव

मतदारयाद्यांचा घोळ मोठा आहे. मतदारांची नावे मोठ्या प्रमाणात यादीतून गायब झाली आहेत. या घोळास जे कुणी जबाबदार असतील, मग ते निवडणूक आयोगाचे अधिकारी असले तरी त्यांच्यावर कारवाई झाली पाहिजे. यामागे काही षडयंत्र आहे का, याचा तपासही निपक्षपातीपणे व्हायला हवा, अशी मागणी उद्धव यांनी यावेळी केली.