निर्णयाची वेळ जवळ आलीय; सेनेचा इशारा

मटा ऑनलाइन वृत्त । मुंबई

मतदारसंघातील विकासकामांसाठी निधी मिळत नसल्याचा आरोप करणाऱ्या शिवसेनेच्या आमदारांनी आता थेट सत्तेतून बाहेर पडण्याची तयारी दर्शवली आहे. 'तुम्ही सरकारमधून बाहेर पडण्याचा निर्णय घ्या. आम्ही सोबत आहोत,' असा शब्दच सेनेच्या आमदारांनी शिवसेनेचे पक्षप्रमुख उद्धव ठाकरे यांना दिल्याचं समजतं. आमदारांच्या या टोकाच्या पवित्र्यामुळं राज्याच्या राजकारणात दिवाळीआधीच फटाके फुटण्याची शक्यता आहे.

शिवसेनेच्या आमदार व मंत्र्यांची महत्त्वपूर्ण बैठक आज 'मातोश्री' निवासस्थानी झाली. या बैठकीतील चर्चेबाबत पूर्णपणं गुप्तता पाळण्यात आली होती. यावेळी उद्धव यांनी आमदार, खासदार व मंत्र्यांकडं रिपोर्ट कार्ड मागितल्याचं समजतं. आमच्या मतदारसंघातील विकासकामं निधीअभावी ठप्प झाल्याची तक्रार सेनेच्या आमदारांनी यावेळी केली. तर, शिवसेनेच्या मंत्र्यांना फारसे अधिकारच नसल्याचा मुद्दा उद्धव यांच्याकडं उपस्थित करण्यात आला. आमदार, मंत्र्यांच्या या तक्रारीनंतर पुढील निर्णयाबाबत उद्धव यांनी आमदारांना त्यांचं मत विचारलं. त्यावर, 'आपण योग्य तो निर्णय घ्यावा, आम्ही तुमच्यासोबत आहोत,' असं आमदारांनी उद्धव यांना सांगितल्याचं समजतं.

शिवसेना निर्णयाच्या जवळ आहे...

शिवसेना नेते, खासदार संजय राऊत यांनी बैठकीतील चर्चेची माहिती दिली. 'राज्यात महागाई वाढली असून लोकांमध्ये नाराजी आहे. या प्रश्नांवर धडक मोर्चा काढण्याचा निर्णय यावेळी झाल्याचं राऊत यांनी सांगितलं. उद्धव ठाकरे यांनी सर्व आमदारांशी चर्चा केली. सत्तेत राहायचं की नाही याबद्दलही मत जाणून घेतलं. आमदारांनी त्यांची मतं सांगितली आहेत. शिवसेना आता निर्णयाच्या जवळ आहे,' असा सूचक इशारा राऊत यांनी दिला. सरकरचे काय करायचे?होय,शिवसेना निर्णयाच्या जवळ आली आहे. wait and watch. — Sanjay Raut (@rautsanjay61) September 18, 2017