मुंबई: महाराष्ट्र विधानसभा निवडणूक निकालानंतर शिवसेनेनं महायुतीच्या ठरलेल्या फॉर्म्युल्यावरून भाजपवर दबाव टाकण्याचे प्रयत्न सुरू केले असतानाच, शिवसेनेनं 'कार्टुन'हल्ला चढवून भाजपला डिवचण्याचा प्रयत्न केला आहे. शिवसेनेचे खासदार संजय राऊत यांनी एक व्यंगचित्र ट्विट केलं असून, 'बुरा न मानो दिवाली है' अशी ओळ पोस्ट केली आहे. त्यामुळं महाराष्ट्रात सरकार स्थापन्याआधी पुढील काही दिवस शिवसेना-भाजप यांच्यात तुंबळ वाकयुद्ध रंगण्याची चिन्हे आहेत.

महाराष्ट्र विधानसभेच्या निवडणुकीचे निकाल हाती आल्यानंतर राज्यात पुन्हा सत्तास्थापनेची संधी मिळालेल्या भाजप-शिवसेनेमध्ये कुरबुरीचा नवा अंक सुरू झाला आहे. अनपेक्षित निकालावरून शिवसेना पक्षप्रमुख उद्धव ठाकरे यांनी भाजपवर अप्रत्यक्ष टीका केली आहे. महाराष्ट्राच्या जनतेला उतमात मान्य नव्हता आणि नाही, असं उद्धव म्हणाले. मुख्यमंत्री देवेंद्र फडणवीस यांनाही उद्धव यांनी चिमटा काढला आहे. 'मुख्यमंत्र्यांनी स्वत:ला महाराष्ट्रातील तेल लावलेला शक्तिशाली पहेलवान म्हणून घोषित केले होते. मात्र, 'तेल' थोडे कमी पडले. मातीतल्या कुस्तीतले वस्ताद म्हणून शरद पवार यांनी 'गदा' जिंकली,' असं उद्धव यांनी म्हटल आहे. या निवडणुकीत पुन्हा एकदा पवारांच्या नेतृत्वाचा कस लागला. ते एका जिद्दीनं लढले, असे कौतुकोद्गार त्यांनी काढले.


निवडणुकीच्या सर्व बातम्या, व्हिडिओ एकाच ट्विटवर

दुसरीकडे शंभरच्या जवळपास जागा जिंकणाऱ्या भाजपला सत्तेपासून दूर ठेवण्यासाठी शिवसेनेला राष्ट्रवादी काँग्रेस आणि काँग्रेस पक्ष पाठिंबा देतील अशी जोरदार चर्चा राजकीय वर्तुळात तसेच सोशल मीडियावर सुरू झाली होती. विधानसभा निवडणुकीत किंगमेकर ठरलेले राष्ट्रवादीचे नेते शरद पवार यांनी 'शिवसेना आमचा मित्रपक्ष नाही,' असं सांगून या चर्चेला पूर्णविराम देण्याचा प्रयत्न केला असला तरी, शिवसेनेनं सत्तेत समान वाटा घेण्याची भूमिका मांडली असल्यानं आता सत्ता स्थापन होईपर्यंत महायुतीत कुरबुरी सुरू राहतील. त्यात शिवसेनेचे नेते आणि खासदार संजय राऊत यांनी एक ट्विट करून सत्तासंग्रामात नवा ट्विस्ट आणला आहे. त्यांनी एक व्यंगचित्र ट्विट केलं आहे. त्यात वाघाच्या हाती कमळ असून, तो वाघ कमळाला हुंगत आहे. विशेष म्हणजे या व्यंगचित्रात वाघाच्या गळ्यात घड्याळ दाखवण्यात आला आहे. त्यामुळं सरकार स्थापन करेपर्यंत भाजपवर दबाव निर्माण करण्याची शिवसेनेची रणनीती असल्याचं मानलं जात आहे.

महाराष्ट्राला उतमात मान्य नव्हता; सेनेचा भाजपवर बाण

पुढची टर्म शिवसेनेच्या दबावाखाली