शिवसेनेची नजर आता मुस्लिम मतांवर

टाइम्स न्यूज नेटवर्क । मुंबई

'मुंबई देशाला ४० टक्के कर देते, तरी मुंबईकरांवरच सर्जिकल स्ट्राइक होतो. उद्योग, नोकऱ्यांवर कुऱ्हाड, गरीब रांगेत मरतो'... या शिवसेनेच्या जाहिरातीने शुक्रवारी वृत्तपत्रांची पाने भगवी झाली होती. पण बातमी ही नव्हे; बातमी ही आहे की ही जाहिरात सर्व उर्दू वृत्तपत्रांमध्ये उर्दू भाषेत झळकली. याला प्रचाराची रणनिती म्हणा किंवा युती तुटल्यामुळे घेतलेला धसका म्हणा, पण ज्या मुस्लिमांवर आगपाखड करून इतकी वर्षे शिवसेनेने अस्मितेचे राजकारण केले त्या मुस्लीम मतदारांना सेनेने साद घातली आहे.

शिवसेनेच्या २२७ उमेदवारांपैकी अवघे ५ मुस्लिम आहेत, तरीही पक्ष कधी नव्हे इतक्या तीव्रपणे मुस्लिम समुदायापर्यंतही पोहोचण्याचा प्रयत्न करत आहे. उर्दु वर्तमानपत्रात आलेल्या जाहिराती हे याचेच द्योतक आहे. 'काही मुस्लिम पट्ट्यात विशेषत: गोवंडी-मानखुर्दसारख्या मुस्लिम भागात आमच्या काही जागा वाढतील अशी आम्हाला आशा आहे. हाजी अराफत आणि मी आक्रमकपणे प्रचार करतो आहे. आम्हाला प्रतिसादही चांगला मिळत आहे,' अशी माहिती महाराष्ट्र शिव वाहतूक सेनेचे उपाध्यक्ष साजीद सोपारीवाला यांनी दिली. शुक्रवारी काँग्रेसच्या नगरसेविका शहाना रिझवान खान यांनीही शिवसेनेत प्रवेश केला.

'भाजप-शिवसेना नेत्यांमध्ये सध्या सुरू असलेल्या शाब्दिक लढाईची मुस्लिम मतदार चांगलीच मजा घेत आहेत. काही सेना नेते नरेंद्र मोदींना जाहीर सभेत 'फेकू' म्हणत असल्याने मुस्लिमांना थोडा दिलासा मिळत आहे. शिवसेनेने आपली अल्पसंख्याकविरोधी भूमिकाही नरमाईने घेतली आहे. आमचा पक्ष मुस्लिमविरोधी नाही, आम्हाला महाराष्ट्राच्या विकासाची काळजी आहे, हे उद्धव ठाकरे बोलल्याप्रमाणे करतील तर काही मुस्लीम कदाचित त्यांच्या उमेदवारांना पाठिंबाही देतील,' असे एका मुस्लिम नेत्याने सांगितले.