ही टीका भाजपला भारी पडेल: शिवसेना

मटा ऑनलाइन वृत्त । मुंबई

'शिवसेना पक्षप्रमुख उद्धव ठाकरे यांच्यावर भाजपच्या काही फडतूस लोकांनी केलेली टीका शिवसेनेने गंभीरपणे घेतली आहे. शिवसैनिकांमध्ये यामुळे प्रचंड खदखद आहे. ही खदखद उफाळली तर तुम्हाला भारी पडेल', असा इशारा देतानाच 'शिवसेनेच्या पाठिंब्यावर तुमचे सरकार चालू आहे याचे भान ठेवा, नाहीतर छगन भुजबळ, सुनील तटकरे आणि अजित पवार यांच्या पाठिंब्यावर सरकार चालवायला तुम्ही खुशाल मोकळे आहात', अशा शब्दांत शिवसेना नेते, खासदार संजय राऊत यांनी आज भाजपवर पलटवार केला.

भाजपचे महाराष्ट्र प्रदेश प्रवक्ते माधव भांडारी यांनी पक्षाच्या 'मनोगत' या पाक्षिकात ‘राऊत साहेब, तलाक केव्हा घेताय?’, अशा शिर्षकाखाली लिहिलेल्या लेखात उद्धव ठाकरे यांची तुलना 'शोले' चित्रपटात जेलरची भुमिका करणाऱ्या असरानीशी केली होती. त्यामुळे शिवसेना-भाजप युतीत नवं वादळ उठलं आहे. भाजपने भांडारी यांचं हे वैयक्तिक मत असल्याचे स्पष्टीकरण देऊन याप्रकरणी हात वर केले असले तरी शिवसेनेला हा खुलासा पटलेला नाही. त्यामुळेच उद्धव यांच्यावर जी टीका झाली ती भाजपची अधिकृत भूमिका आहे की नाही, याबाबत मुख्यमंत्री देवेंद्र फडणवीस यांनी तातडीने खुलासा करावा, अशी मागणी राऊत यांनी केली.

'टीका धोरणांवर होऊ शकते मात्र येथे व्यक्तिगतरित्या खालच्या पातळीवर जाऊन जी टीका करण्यात आली आहे ते पाहता भाजपमधील काही मंडळींना स्वत:चे सरकार आणि महाराष्ट्रही बुडवायचा आहे, असे दिसत आहे', असा टोला राऊत यांनी लगावला.

...अन्यथा शिवसैनिक तुमचा 'बंदोबस्त' करतील!

'अशाप्रकारचा गोंधळ आणि अराजक निजामाच्या काळात होते. पक्षातील वरिष्ठ नेत्यांनी गोंधळ घालणाऱ्या लोकांना तत्काळ चाप लावावा. नाहीतर शिवसेना पक्षप्रमुखांची बदनामी करणाऱ्यांचा बंदोबस्त करायला शिवसैनिक समर्थ आहेत. हे कोणाचे वैयक्तिक मत नाही तर ही शिवसेनेची भूमिका आहे', असा इशाराही राऊत यांनी दिला.