'तुम्ही निकराने खिंड लढवली...'; संजय राऊतांकडून सुषमा अंधारेंच्या पाठीवर कौतुकाची थाप

मुंबई : शिवसेना उद्धव बाळासाहेब ठाकरे या पक्षाच्या उपनेत्या सुषमा अंधारे यांनी खासदार संजय राऊत यांची भेट घेतली आहे. मनी लॉन्ड्रिंग प्रकरणात ईडीने अटकेची कारवाई केल्यामुळे तब्बल १०२ दिवस तुरुंगात असणाऱ्या राऊत यांना मंगळवारी पीएमएलए कोर्टाने जामीन मंजूर केल्याने त्यांची सुटका झाली. राऊत यांच्या सुटकेनंतर शिवसैनिकांमध्ये आनंदाचं वातावरण असतानाच उपनेत्या सुषमा अंधारे यांनी त्यांची निवासस्थानी जाऊन भेट घेतली. या भेटीवेळी शिवसेनेतील फुटीनंतर भक्कमपणे पक्षाची बाजू मांडल्याबद्दल संजय राऊत यांनी सुषमा अंधारे यांच्या पाठीवर कौतुकाची थाप टाकली आहे.

सुषमा अंधारे यांनी खासदार राऊत यांची भेट घेतल्यानंतर प्रसारमाध्यमांना या भेटीचा तपशील दिला. 'आजच्या भेटीवेळी मी राऊतसाहेबांना म्हटलं, सर आम्ही खारीचा वाटा उचलायचा प्रयत्न केला. आम्ही आमच्या परीने खिंड लढवली. फार मोठे काही केलं नाही. त्यावर राऊत साहेब उत्तरले, ही खिंड निकराने लढलात, त्यामुळे ती पावनखिंड झाली,' असं राऊत यांनी म्हटल्याचं सुषमा अंधारेंनी सांगितलं.

Ajit Pawar : अजितदादा संतापले, 'मला बदनाम करण्याचा प्रयत्न, आता पत्रकार परिषद घेऊन बोलणार'

'शिवसेनेची ताकद १० पटीने वाढली'

संजय राऊत हे गेल्या अनेक वर्षांपासून शिवसेना आणि ठाकरे कुटुंबाची बाजू मांडत राजकीय विरोधकांशी दोन हात करत असतात. मात्र शिवसेनेतील फुटीनंतर पक्ष संकटात असतानाच त्यांना तुरुंगात जावं लागलं. मात्र आता १०२ दिवसांच्या प्रतिक्षेनंतर ते पुन्हा तुरुंगातून बाहेर आल्याने शिवसैनिकांमध्ये उत्साह पाहायला मिळत आहे. सुषमा अंधारे यांनीही अशाच भावना व्यक्त केल्या आहेत.

'शिवसेनेतील सगळ्यात लांब पल्ल्याची तोफ आणि गुरुतुल्य व्यक्तिमत्व सन्माननीय संजय राऊत साहेबांची त्यांच्या निवासस्थानी भेट घेतली. बऱ्याच दिवसानंतर मनमोकळ्या गप्पा झाल्या. राऊत साहेबांच्या येण्याने खूप ताण कमी झाल्यासारखा वाटत आहे. थोडेसे हलके वाटत आहे आणि सोबतच शिवसेनेची ताकद १० पटीने वाढली आहे,' असं सुषमा अंधारे यांनी म्हटलं आहे.