किरीट सोमय्या यांच्यावर गुन्हा दाखल होताच राऊतांचा हल्लाबोल; जनतेलाही केलं आवाहन

मुंबई : युद्धनौका INS विक्रांतसाठी लोकांकडून जमा केलेल्या पैशाचा अपहार केल्याप्रकरणी भाजप नेते आणि माजी खासदार किरीट सोमय्या यांच्यासह त्यांचे सुपुत्र नील सोमय्या यांच्यावर मुंबई पोलिसांत गुन्हा दाखल झाला आहे. शिवसेना नेते संजय राऊत यांनी याबाबत आरोप केल्यानंतर एका माजी सैनिकानेही पोलिसांकडे तक्रार केली आणि त्यानंतर हा गुन्हा दाखल करण्यात आला. सोमय्या पिता-पुत्रावर गुन्हा दाखल होताच राऊत यांनी पुन्हा एकदा ट्वीट करत आक्रमक भूमिका घेतली आहे. (Sanjay Raut On Kirit Somaiya)

'INS विक्रांतच्या नावे ५६ कोटी रुपये गोळा करून जनतेला आणि देशाला फसवणाऱ्या सोमय्या बाप-लेकाला तुरुंगात जावंच लागेल. किरीट सोमय्या हा महाराष्ट्रद्रोही तर होताच पण देशद्रोही असल्याचंही उघड झालं आहे,' असा घणाघात संजय राऊत यांनी केला आहे. तसंच यावेळी राऊत यांनी जनेतलाही आवाहन करत आता गप्प बसू नये, जवानांचे शोषण करणाऱ्या भाजपला जाब विचाराच लागेल, असं म्हटलं आहे.

किरीट सोमय्या आणि नील सोमय्यांवर फसवणुकीचा गुन्हा; माजी सैनिकांनी दाखल केली तक्रार

किरीट सोमय्या यांचा पाय खोलात?

केंद्रीय तपास यंत्रणांकडून महाराष्ट्रातील विविध नेत्यांवर कारवाई करण्यात येत असताना राज्याच्या गृहमंत्रालयानेही आक्रमक भूमिका घ्यावी, अशी मागणी महाविकास आघाडीच्या नेत्यांकडून गेल्या अनेक दिवसांपासून करण्यात येत आहे. सक्तवसुली संचालनालयाने (ईडी) नुकतीच संजय राऊत यांच्या संपत्तीवर टाच आणली. या कारवाईनंतर आक्रमक झालेल्या राऊत यांनी काल दिल्लीत पत्रकार परिषद घेत किरीट सोमय्या यांच्यावर घणाघाती आरोप केला. INS विक्रांत भंगारात निघू नये, असं सांगत किरीट सोमय्या यांनी लोकांकडून पैसे जमा केले. माजी सैनिकांनीही यासाठी निधी दिला. मात्र नंतर हा पैसा राजभवनात जमा न करता किरीट सोमय्या यांनी तो आपल्या निवडणुकीसाठी वापरला, असा दावा संजय राऊत यांनी केला होता. त्यानंतर आज मुंबईतील एका माजी सैनिकाच्या तक्रारीनंतर या प्रकरणात किरीट सोमय्या आणि नील सोमय्या यांच्याविरोधात गुन्हा दाखल करण्यात आला आहे.

दरम्यान, मुंबई पोलिसांत दाखल करण्यात आलेल्या गुन्ह्यात सोमय्या पिता-पुत्रावर आगामी काळात काय कारवाई करण्यात येते, हे पाहणं महत्त्वाचं ठरणार आहे.