शिवसेनेने विमानतळावरील टोलनाका बंद पाडला

मटा ऑनलाइन वृत्त । मुंबई

विमानतळावर अनधिकृत एंट्री टोलच्या माध्यमातून प्रवाशांची लुबाडणूक करणाऱ्या जीव्हीकेला आज शिवसेनेने जोरदार दणका दिला. शेकडो संतप्त शिवसैनिकांनी जीव्हीकेवर धडक देत हा टोलनाका बंद पाडला. यावेळी 'हर हर महादेव' आणि 'जय शिवाजी, जय भवानी'च्या घोषणांनी संपूर्ण परिसर दणाणून गेला होता.

शिवसेनेचे आमदार अॅड. अनिल परब यांच्या नेतृत्वाखाली शेकडो शिवसैनिकांनी जीव्हीके विमानतळावर धडक देत विमानतळाच्या बाहेर जोरदार घोषणाबाजी करत आंदोलन केलं. त्यामुळे विमानतळ प्रशासनही हादरून गेलं. विमानतळाबाहेर मोठ्याप्रमाणावर आंदोलक शिवसैनिक जमा झाल्याने या परिसरात वाहतुकीची कोंडी झाली. दरम्यान, शिवसेनेच्या आंदोलनानंतर विमानतळावर पोलिसांचा मोठा फौजफाटा तैनात करण्यात आला आहे.

...तर विमानतळाच्या आत घुसू

जीव्हीकेने टोलधाड पुन्हा सुरु केल्यास गंभीर परिणाम भोगावे लागतील. आज विमानतळाच्या बाहेर आंदोलन केलं, उद्या आत घुसायला वेळ लागणार नाही, असा इशारा शिवसेनेचे आमदार अनिल परब यांनी दिला. तसंच टोल वसुली सुरु केल्यास विमानतळ बंद पाडण्याचा इशाराही त्यांनी दिला. मुंबई विमानतळ परिसरात प्रवेश केला तर प्रत्येक फेरीवर एन्ट्री फीच्या नावाखाली १३० रुपये वसूल केले जातात. त्यासाठी पार्किंग करायचीही गरज नाही. आत शिरताच टोलसक्ती लागू होते. मात्र टोल मागणाऱ्याकडे पावती पुस्तकाशिवाय कुठलंच उत्तर नसतं. त्यामुळे प्रवाशांमध्ये संताप खदखदत होता. शिवसेनेने आज या संतापाला वाट मोकळी करून देत जीव्हीकेला दणका दिला.

संपूर्ण देशात फक्त इथेच एअरपोर्ट ऑथरिटी आणि सिव्हिल एव्हिएशनचे नियम धाब्यावर बसवून प्रवाशांची रोज लाखोंना लूट होते, असा आरोप माहिती अधिकार कार्यकर्ते विश्वास भांबुरकर यांनी केला होता. त्यावर मुंबई विमानतळ अतिसंवेदनशील आहे. वाहनांच्या गर्दीमुळेच खासगी वगळता इतर वाहनांवर एन्ट्री टोल घेतला जातो. एअरपोर्ट ऑथरिटी आणि मुंबई इंटरनॅशनल एअरपोर्ट लिमिटेडच्या करारानुसार टोल दर ठरवण्याचे सर्वस्वी अधिकार जीव्हीकेकडे आहेत, असा खुलासा जीव्हीकेनं केला होता. प्रवाशांसाठी खास इलेव्हटेड रोड बांधला गेला आहे. त्याच्या सेवेसाठी हजारो कर्मचारी असतात. एन्ट्री फीचा पैसा या सर्व देखभालीसाठी दिला जातो, असं जीव्हीकेचं म्हणणं आहे.