मुंबईकरांचा मालमत्ता कर रद्द करणार: उद्धव

मटा ऑनलाइन वृत्त । मुंबई

मुंबई महापालिकेची सत्ता राखण्याच्या निर्धारानं मैदानात उतरलेल्या शिवसेनेनं मुंबईकरांना खूश करण्यासाठी आज मोठी घोषणा केली. 'महापालिका निवडणुकीनंतर मुंबईतील ५०० चौरस फुटांपर्यंतच्या घरांचा मालमत्ता कर माफ केला जाईल,' असं वचन शिवसेनेचे पक्षप्रमुख उद्धव ठाकरे यांनी दिलं.

शिवसेना-भाजपच्या युतीची चर्चा अजून सुरू असतानाच उद्धव यांनी आज 'मातोश्री'वर पत्रकार परिषद घेतली. उद्धव ठाकरे हे युतीच्या संदर्भात काहीतरी बोलतील, अशी अपेक्षा होती. मात्र, त्याबद्दल काहीही ठोस न सांगता त्यांनी शिवसेनेच्या वचननाम्यातील ठळक आश्वासनं जाहीर केली. मुंबईत पुन्हा शिवसेनेची सत्ता आल्यास मुंबईतील ५०० चौरस फुटांपर्यंतच्या घरांचा मालमत्ता कर माफ केला जाईल. तसंच, ७०० चौरस फुटांपर्यंतची घरं असलेल्यांना मालमत्ता करात सवलत दिली जाईल, असं उद्धव यांनी सांगितलं. आरोग्य सुविधांपासून वंचित राहावं लागणाऱ्या मुंबईकरांसाठी 'शिवसेनाप्रमुख बाळासाहेब ठाकरे सुरक्षा कवच योजना' सुरू केली जाईल, असंही त्यांनी सांगितलं.

'मुंबईकरांसाठी शिवसेनेनं आतापर्यंत काय केलं आहे, याच्या जाहिराती सुरूच आहेत. पण पुढील पाच वर्षांत शिवसेना मुंबईकरांना काय देणार आहे, याचा वचननामा २६ जानेवारी रोजी गोरेगाव येथे होणाऱ्या मेळाव्यात जाहीर केला जाईल,' असंही उद्धव यांनी यावेळी सांगितलं.

युतीसाठी वाट बघा!

शिवसेना-भाजपच्या युतीच्या प्रश्नाला उद्धव यांनी खुबीनं बगल दिली. 'युतीची चर्चा सकारात्मक दिशेनं सुरू आहे. या चर्चेवर परिणाम होईल, असं मी आता काहीही बोलणार नाही. काय होतंय त्याची वाट मीही बघतोय. तुम्हीही बघा,' असं ते म्हणाले.