‘शोध मराठी मनाचा’ ७, ८ जानेवारीला मुंबईत

म. टा. प्रतिनिधी, मुंबई

जागतिक मराठी अकादमी व श्री छत्रपती शिवाजी स्मारक मंडळ आयोजित ‘शोध मराठी मनाचा-२०१७’ हे १४ वे जागतिक मराठी संमेलन ७ व ८ जानेवारी रोजी मुंबईत शिवाजी मंदिर, दादर येथे होणार आहे. या संमेलनाच्या अध्यक्षस्थानी अमेरिकास्थित उद्योगपती अविनाश राचमाले यांची निवड झाली आहे. या संमेलनाचे उद‍्घाटन शरद पवार यांच्या हस्ते केले जाणार आहे. या सोहळ्यात अभिनेते सचिन पिळगावकरआणि जयंत सावरकर यांना जीवनगौरव पुरस्काराने सन्मानित केले जाणार आहे.

या जागतिक मराठी संमेलनात चित्रपट, रंगभूमी, कला, साहित्य, क्रीडा, ज्ञान, माहिती आणि मनोरंजन इत्यादी कार्यक्रम होणार असून त्यात अमेरिका, कॅनडा, ऑस्ट्रेलिया, इस्रायल, कतार, लंडन, युके आदी देशांतील लोक सहभागी होणार आहेत. संमेलनाच्या समारोपासाठी मुख्यमंत्री देवेंद्र फडणवीस, सांस्कृतिक कार्यमंत्री विनोद तावडे यांना निमंत्रित करण्यात आल्याची माहिती जागतिक मराठी अकादमीचे अध्यक्ष रामदास फुटाणे यांनी दिली. या संमेलनात जगातील व भारतातील कर्तृत्ववान मराठी माणसांच्या मुलाखती आयोजित केल्या असून हे संमेलन सर्वांसाठी विनामूल्य खुले आहे.